Mınıstr qazir jumys istep turǵan mektepterdegi oqýshy sanyn retteý maqsatynda salynyp jatqan jańa mektepterdiń qurylysy men «Jaıly mektep» ulttyq jobasy boıynsha 2023 jyly mektep qurylysy bastalatyn oryndarmen tanysty.
«Qosshyda bıylǵy qyrkúıek aıynda 1 200 oryndyq mektep paıdalanýǵa berildi. Qazir munda taǵy eki jańa mektep salynyp jatyr. Olar 2023 jyldyń jazyna deıin paıdalanýǵa beriledi dep josparlanyp otyr. Qurylys jumystarymen tanystym. Memleket basshysy Qasym-Jomart Toqaevtyń tapsyrmasymen ázirlengen «Jaıly mektep» jobasy aıasynda kelesi jyly 11 000 oryndyq taǵy 3 mekteptiń qurylysy bastalady (eki aýysym). Bul oqýshylar ornynyń jetispeýshiligi máselesin tolyǵymen sheshýge múmkindik beredi», dep jazady mınıstr Facebook paraqshasynda.
Ashat Aımaǵambetovtyń aıtýynsha, zańdy túrde mektep salý jáne oǵan bıýdjetten qarjy bólý ákimdikterdiń quzyrynda.
«Olardy jobalaý, qurylys mekemelerin tańdaý jumystarymen de jergilikti qurylys basqarmalary aınalysady. Alaıda, bul máseleni baqylaýda ustaý mańyzdy», dep qosty vedomstvo basshysy.
Sondaı-aq 2023 jyly «Jaıly mektep» jobasy aıasynda Qajymuqan aýylynda 1 800 oryndyq bir mektep salý josparlanǵan.
«Bul oqýshy ornynyń tapshylyǵy máselesin tolyǵymen sheshedi. Sonymen qatar, Úrkerdegi №69 mektep-gımnazııasynda da boldym. Oqý kabınetterin, psıhologııalyq-pedagogıkalyq túzetý, robototehnıka kabınetterin aralap shyqtym. Muǵalimdermen áńgimelestim. Bul mektepte 28 bala ınklıýzıvti bilim alady. Mektep úsh aýysymdy. Oǵan jaqyn jerden 2023 jyly «Jaıly mektep» aıasynda 2 000 oryndyq jańa mekteptiń qurylysy bastalady», dep jazdy mınıstr.
