Atalǵan uıymnyń basshylyǵy AQSh-tyń Las-Vegas qalasynda ótetin jekpe-jekte jeńiske jetken jaǵdaıda qandasymyzdy Haıme Mýngııamen judyryqtasýdy mindettedi. Bul qarsylastardyń ekeýi de óte myqty. Kásipqoı boksty serik etken bes jyl aralyǵynda 27 jastaǵy Bentlı 19 kezdesý ótkizip, 17 ret jeńiske jetti. 14 qarsylasyn nokaýtqa jiberdi. Bir ret utylyp, taǵy bir básekede teń esep tirkeldi. Onyń Ulybrıtanııa chempıony degen ataǵy bar.
26 jastaǵy Mýngııa 2013 jyldan beri kásipqoı rıngte óner kórsetedi. Sol kezden beri 40 jekpe-jek ótkizip, birde-bir ret jeńilistiń kermek dámin tatqan emes. 32 qarsylasyn uryp jyqty. Meksıkanyń marqasqasy 2018-2019 jyldary birinshi orta salmaq dárejesinde álem chempıony atandy. Kezinde ol Sadam Álı, Lıam Smıt, Brendon Kýk, Garı O’Sallıvan, Týreano Djonson, Kamıl Sheremet, Gabrıel Rosado, Dımıtrıýs Ballard, Djımı Kellı syndy sańlaqtardy san soqtyrǵan. 2018 jyly Haıme bizdiń Gennadıı Golovkınmen judyryqtasýǵa tıis edi. Alaıda Nevada shtatynyń atletıkalyq komıssııasy «Mýngııanyń tájirıbesi áli tolysqan joq» dep bul básekeni ótkizbeı tastady.
