Qazaqstan elshisi

Reseı jaratylystaný ǵylymdary akademııasynyń sheteldik akademıgi

Qazaqstan Respýblıkasynyń Reseı Federasııasyndaǵy elshisi Marat Tájın Reseı jaratylystaný ǵylymdary akademııasynyń (RAEN) qurmetti sheteldik akademıgi ataǵyna ıe boldy. Dıplom tapsyrý rásimi keshe Máskeýde Reseı Federasııasy Prezıdentiniń janyndaǵy Reseı halyq sharýashylyǵy jáne memlekettik qyzmet akademııasynyń ǵımaratynda bolyp ótti. RAEN akademııasy prezıdentiniń birinshi orynbasary Lıdııa Ivanıskaıa marapattaý rásimi barysynda Qazaqstan-Reseı yntymaqtastyǵynyń joǵary deńgeıin atap ótip, osy úderiste ǵylymnyń erekshe oryn alatynyna nazar aýdardy. Onyń pikirinshe, M.Tájınge berilgen sheteldik akademık ataǵy elshiniń eki el ǵalymdar qaýymdastyqtary arasyndaǵy baılanystardy nyǵaıtýǵa qosqan eleýli úlesiniń, sondaı-aq, doktor jáne akademık retinde sosıologııa ǵylymyn damytýǵa sińirgen zor eńbeginiń belgisi. «Búgingi oqıǵa, birinshiden, memleketter basshylary Nur­sultan Ábishuly Nazarbaev jáne Vladımır Vladı­mırovıch Pýtın belgilep bergen Qazaqstan-Reseı baıla­nys­tarynyń keń aýqymyn kórsetedi. Men osynda, eýra­zııa­lyq yqpaldastyqtyń damýyna arnalǵan Qazaqstan Prezıdentiniń M.V.Lomonosov atyndaǵy Máskeý memlekettik ýnıversıtetinde jaqynda oqyǵan dárisi barysynda aıtqa­nyndaı, ǵalymdar qaýymdastyǵy men Reseı qoǵamy Eýrazııalyq ekonomıkalyq odaq ıdeıasyn qoldaıtynyn kórip otyrmyn», dedi óziniń sózinde M.Tájın.