Konferensııa kezinde senimdi tulǵalar óńirlerdegi shtab jumystary týraly esep berdi. Onlaın-kezdesý barysynda saılaý naýqanynyń barysy men kandıdattyń josparlanǵan saparlaryna qatysty birqatar másele kóterildi.
Kúnniń ekinshi jartysynda M.Qajyken kásipodaqtar men bıznes-qoǵamdastyq ókilderimen kezdesti. Dóńgelek ústel barysynda qatysýshylar áleýmettik áriptestik, eńbek jáne áleýmettik qatynastardy retteý taqyryptaryn talqylady. Taraptar búgingi tańda úsh qatysýshy – Úkimet, jumys berýshiler men kásipodaqtar birlestikteri qol qoıatyn basty kelisim, qyzmetkerlerdiń múddelerin jetkilikti deńgeıde qorǵaýdy qamtamasyz etpeıtinin málimdedi. M.Qajykenniń aıtýynsha, áleýmettik áriptestik – azamattyq qoǵam faktorlarynyń biri. «Álemdik tájirıbede eki tarap – jumys berýshi men qyzmetkerdiń pikirleri bir jerden shyqpasa, onda talqylaý barysynda olar ózara tıimdi sheshimderge qol jetkize almaıdy. Osydan soń olar zań júzinde, belgili bir normalar men erejelerdi qabyldaý úshin memleketke teń seriktes retinde kómekke júginedi. Bul biz aldaǵy ýaqytta qol jetkizetin, taraptardyń qarym-qatynasynyń jańa formaty bolmaq», dedi ol.
