Sábı jórgegi

Shahar basshysynyń aıtýynsha, mundaǵy negizgi maqsat – megapolıstiń ımportqa táýel­diligin azaıtyp, eksportty kú­sheıtý. Sondaı-aq osy baǵytta ınves­tısııa tartý jalǵasa bere­tinin jáne sol arqyly jańadan ashylatyn jumys oryndarynyń qatary artatynyn jetkizdi.

Aıta ketý kerek, jaýapty bas­qarma basshylary, aýdan ákimderi men ınvestorlar bas qosqan jıynda jalpy 12 jańa joba tanystyryldy. Máselen, «Amına Inteks» JShS basshysy Alı Gohar «Bozaryq» agro-ındýstrıaldy aımaǵyn mal azyǵy óndirisin ashýdy kózdep otyrǵanyn aıtty. 1 mlrd teńgeni quraıtyn ınvest jobanyń qýattylyǵy jylyna 1 200 tonna ónim shyǵarýǵa qaýqarly. 2023 jyly júzege asyrylatyn jobanyń nátıjesinde 200 adam jumyspen qamtylady.

Sonymen qatar «SAN GRAND» JShS basshysy Baǵ­lan Tajenov «Juldyz» ındýs­trıaldy aımaǵyndaǵy 9 gektar jerde birneshe jobany júze­ge asyrmaq. Onyń birinshisi – 13 mlrd teńgeni quraıtyn sábı­lerdiń jórgegin shyǵaratyn otan­dyq iri kásiporyn bolsa, ekin­shisi – 9,3 mlrd teńge bolatyn shyny talshyqty tereze pro­fılderiniń óndirisi. Atalǵan jobalardy qolǵa alý arqyly jumyssyz júrgen 300-ge jýyq azamatqa keleshekte turaqty jumys tabylady.

Budan bólek, «AnDa Com­pany» JShS basshysy Dmıtrıı Tara­nov bıofarmasevtıkalyq zaýyttyń jobasymen tanys­tyr­dy. Jylyna 500 myń doza vak­­sına shyǵaratyn qýatty óndi­ris oshaǵy «Tassaı» ındýstrıal­dy aımaǵynan salynady. Jobanyń quny – 1 800 mln teńge. Nysan qurylysy 2023-2024 jyldarǵa josparlanǵan. Qurylys aıaqtal­ǵan sátte 35 azamat turaqty ju­mys­pen qamtylady. Investor atal­ǵan jobany iske asyrý úshin jergilikti ákimdikten qurylys nysanyn elektr jaryǵymen, gaz, aýyz sý, aǵyn sýmen jáne baılanyspen qamtamasyz etýdi surap otyr.

Shtab otyrysynda budan basqa aıaq kıim, karton qo­rap­taryn shyǵaratyn, densaýlyq sala­syna qajetti preparattar ón­diretin, turǵyn úı jáne kottedj qurylysyna qajetti taǵy basqa da iri onnan astam joba qaraldy. Qala ákimi árbirimen jeke tanysyp, memlekettik qoldaý túrleri men shahardyń bul turǵydaǵy joǵary múmkindikterin baıandap, barlyǵyn zerdelep shyǵý úshin jetekshi sala basshylaryna arnaıy tapsyrmalar júktedi.

Basty jańalyqtyń biri, bıyl jyl sońyna deıin dári­lik zattar men gıgıenalyq ónimder óndiretin ózbekstandyq «Den­ta­fill» jáne shulyq óndirisimen aınalysatyn túrkııalyq «Ekol Ihracat» zaýyttaryn iske qosý kózdelip otyr. Sonymen qatar shtab jıynynda 35 eldiń 310 kompanııasyn qalaǵa ınvestısııa quıýǵa shaqyrý máselesi kún tártibine shyǵaryldy. Qazirgi tańda AQSh-tyń medısınalyq jabdyqtar óndiretin «GE Healthcare» kompanııasymen, tur­mystyq-tehnıkalyq jabdyqtar óndirisiniń kóshbasshysy «Ha­ier», ıtalııalyq «Maire Tecni­mont», japondyq «RP Canon Medical Systems» syndy 8 alyp kompanııany Shymkentke tartý boıynsha kelissózder júrgizilip jatyr.

ShYMKENT