Jármeńkege oblys ákiminiń birinshi orynbasary Marat Tasmaǵanbetov, qala basshysy Rýslan Ańbaev baryp, saýda-sattyqtyń barysyn kórip, azyq-túlik baǵalarymen tanysty.
Qaz-qatar tigilgen shatyrlardyń sóresinde et-sút ónimderinen basqa jemis-kókónis, bal sııaqty ónimder de bar. Tipti túrli jemisterdiń tuqymdary da satyldy. Qyzyljarlyqtar da bul kúni arzandaý azyq-túlik taýarlaryn alýǵa taıly-taıaǵymen asyǵyp jetti.
Jármeńke jaıly aqparat bergen oblystyq aýyl sharýashylyǵy basqarmasynyń bastyǵy Meıram Meńdibaev ónimderdiń qala bazarlarynan kem degende 15-20 paıyzǵa arzan ekenin aıtty. «О́ıtkeni bul jerde deldaldar joq, óndirýshiler tutynýshylarmen tikeleı baılanysyp tur. Sondyqtan eki jaq ta razy», dedi ol.
Shynynda da, ónimder qala dúkenderi men bazarlarǵa qaraǵanda ájeptáýir arzan. «Jumyrtqanyń baǵasy dúkenderde sharyqtap ketti, 10 danasy 500 teńgeden joǵary, keıbir dúkenderde odan da qymbat. Al munda 350 teńgege de alýǵa bolady eken», deıdi qala turǵyny Saltanat Jaqypova. Et pen sút ónimderine de qatysty sondaı pikirlerdi baıqap qaldyq. Bazardaǵy baǵa 3 myńnan kem bolmasa, munda semiz jylqy etin 2 700, sıyr etin 1 800, qoı etin 2 200 teńgege satyp alýǵa bolady. Un, qaraqumyq jarmasy sııaqtylardyń baǵasy da bazarǵa qaraǵanda áldeqaıda arzan.
Aýyldyqtar tamaq ónimderin ǵana emes, mal azyǵyn da ákelipti. Jekemenshik qorasynda shaǵyn mal ustaıtyn qalalyqtar men qala mańyndaǵy úlken eldi meken turǵyndary úshin bul úlken olja boldy. Salmaǵy 3 sentrdeı bolatyn shóp oramasyn 5 myń, saban oramasyn 2 myń teńgege alyp jatqan turǵyndardy da kórdik. «Mal azyǵy úshin jetkizilgen 60 oram shóp pen 40 oram sabandy pyshaq ústi satyp alyp ketti», deıdi Mamlıýt aýdandyq aýyl sharýashylyǵy bóliminiń basshysy Murat Qojaev.
Osyndaı jármeńkeler aldaǵy ýaqytta da qalada senbi saıyn uıymdastyrylyp turady. Olar jergilikti ókimetke qaraıtyn «Shapaǵat», «Darııa», «Altyn arman» bazarlarynda ótedi.
PETROPAVL
