Onyń kózqarasynda óner ómirdiń tek bar ǵajabyn kórsetýi kerek. Adam kartınaǵa qarap turyp, estetıkalyq lázzat alady, ishi jylyp, bir sát jaqsylyqqa senedi, armanyn jalǵaıdy. Sýretshiniń bul oıy aqyn Serik Aqsuńqarulynyń «О́mir degen Kúndi aınalý» degen óleńin eriksiz esińe túsiredi.
Renýar qalamyndaǵy tabıǵı kúı onyń barlyq týyndysynda seziletin baqyt kúıi edi. Sýretshiniń shyǵarmashylyǵynan jalyqqan, sharshaǵan, qajyǵan, jaýyr bolǵan obrazdy, ıakı ómirdiń qońyrqaı bir tustaryn kezdestirý qıyn. Qaz-qatar tizilgen polotno ashyq túster men kún sáýlesine toly.
Renýardy árqashan adamdar qyzyqtyratyn. Sondyqtan da onyń keıipkerleri, negizinen, áıelder, balalar jáne raýshan. Sýretshi olardyń beınelerinde tynyshtyq pen rýhanı erkindik kúıin berýge tyrysty. Portretti de kóp jazdy: týǵan-týys, dostarynyń, tapsyrys berýshilerdiń, ataqty adamdardyń, tipti kóshede nemese kafede jolyqqan beıtanys jandardyń beınesin bir kórgen ásermen sala beretin. Avtordyń kartınalarynyń ishinde, ásirese «Mýlen de la Galettegi bal», «Qaıyqshylardyń tańǵy asy», «Janna Samarıdiń portreti», «Átkenshekte», «Qolshatyrlar», «Sharpante hanym balalarymen» portreti ámbege aıan.
Máselen, Parıjdegi «Komedı Fransez» teatrynyń aktrısasy Janna Samarıdiń portretindegi boıaýlardyń úılesimi, reńkter toǵysy men jylylyqtyń, jastyqtyń, sezimniń, kúnshýaqtyń, tabıǵı sulýlyqtyń áseri qalaı sheber órilgenine tańǵalasyń. Turmys qurǵanǵa deıin Samarı Frosho kóshesindegi sýretshiniń stýdııasy janynda turypty. Sonda sýret saldyrýǵa jıi keletin. 1877 jyly Renýar onyń eń ádemi portretteriniń birin jazdy. Kúlimsiregen, endi bir qaraǵanda, tereń oıǵa batqan, jasyl-kók kóılektegi aktrısa ashyq qyzǵylt fonda tur. Avtor onyń obrazyndaǵy eń áserli jaqtaryna boıaýyn qoıýlandyra túsip, aıshyqtap kórsetedi. Názik symbattylyq, sýyq aqyl, kógildir janardaǵy sál-pál qýlyq hám nur shashqan kúlki, úlpildegen qyzyl shash. Sýretshiniń sheberligi sol, keıipkerdiń syrtqy kelbetindegi ishki rýhanı ózgeristerdiń áreń baıqalatyn tustaryn da jaı ǵana kúlimsireýden, dymqyl kózdiń ottaı jarqyraýynan-aq baıqatady. Osy detaldar arqyly baýratady. Shyn máninde, Janna Samarı ómirde asqan sulý emes desedi. Renýar aktrısanyń boıyndaǵy tabıǵı reńkterdi tereńdete kórsete otyryp, portretti áıgili etken.
Sol Renýar taza aqyldan shyqqannyń bárin jany súımeıtin: sandardy, teorııalardy, formýla, ereje, ıdeıa, qorytyndy. Zııalylardy da, olar asa joǵary mártebemen aıtatyn óner týraly áńgimelerdi de jaqtyrmaıtyn. Al kezdeısoqta jolyqqan adamy keskindeme týraly salıqaly áńgime bastasa, Renýar shydamsyzdanyp, keıde tipti dórekilik kórsetedi. Birde ol sondaı bireýge: «Keshirińiz, men asyl ónerden eshteńe túsinbeımin, tipti habarym joq. Men pornografııalyq janrda jumys isteımin», dep shoshytady.
Iá, sýretshi eshqashan kórkemdik prınsıptermen shektelgen emes, qalaǵanyn óz qalaýynsha saldy. Sodan da bolar, onyń kartınalarynda erekshe bir erkindik seziledi.
Tiginshi Leonard Renýardyń otbasyndaǵy altynshy bala osy Per Ogıýst boldy. Kishkentaı Per-Ogıýst Renýar alǵashqy sýretterin tiginshi borymen úıdiń edenine salyp bastady. Jas talanttyń daýsy da erekshe edi. Toǵyz jasynda Charlz Gýno oǵan opera horynda oryn usynyp, bálkı ánshi bolar dep oılady. Alaıda Ogıýst qylqalamdy tańdady. Sóıtip, 15 jasynda ydys-aıaqtardy boıap, perdelerge Injil kórinisterin salyp, sumdyq aqsha tapty. Áke-sheshesine úı alýǵa kómektesip, shala baıydy. О́ner akademııasyna túsý konkýrsynda 80-niń ishinen 68-oryndy Ogıýst Renýar ıelendi. Sonda da ol óner akademııasymen qatar Gleırdiń sheberhanasynda eki jyl oqydy. Renýardyń sýretshilik bilimi osymen aıaqtaldy.
Onyń kıim bólmesinde árqashan úsh kostıým turatyn. Ekeýi jolaqty sur tústi, úshinshisi keshki frak. Eń eskisin kúnde kıetin, al ekinshisi jumysqa arnalǵan. Ekinshi kostıými ábden tozyp, úıkelgen kezde Renýar ony kóshedegi qaıyrshyǵa beredi. Iаǵnı sýretshi eshqashan palto nemese smokıng kımegen.
Ol fransýz-prýssııa soǵysynda segiz aı boldy. Sýretshi Frederık Vasılıı sııaqty shabýylǵa qatysqan joq jáne Berta Morızo, Dega men Mane sııaqty Parıjdiń tórt aılyq qorshaýyna túspedi. Renýar jóndeý rotasynda qyzmet etti.
Sýretshiniń «Jańa kópir» kartınasy 1875 jyly Drýo qonaqúıinde ótken aýksıonda 300 frankke baǵalandy. Bul Renýardyń sol kezdegi jaqsy baǵaǵa satylǵan shyǵarmasy edi. Al qalǵan 19 kartına mardymsyz tıynǵa – 50-den 90 frankke deıin ótip jatty.
Jalpy, Ogıýst Renýardyń aýksıonda satylǵan eń qymbat kartınasy 78 mıllıon turady. Bul «Mýlen de la Galettedegi bal» kartınasynyń qysqartylǵan avtorlyq kóshirmesi. 1990 jyly satylym kezinde bul jumys eń qymbat kartınalar tiziminde ekinshi orynda boldy.
