Elimizdiń barlyq qıyryn qamtyǵan baıqaýdan jambyldyq baldyrǵandar da tys qalǵan joq. Oblystyq bilim basqarmasyna qarasty «Jambyl daryny» aımaqtyq ǵylymı-praktıkalyq ortalyǵynyń bastamasymen qolǵa alynǵan is-shara Taraz qalasyndaǵy №13 orta mekteptiń bazasynda ótti. Oǵan Taraz qalasyndaǵy orta bilim beretin mektepterdiń 50 oqýshysy qatysyp, ózderiniń izdenis izine túskenderin baıqatty.
Jalpy alǵanda, 3-10 synyp oqýshylaryn qamtyǵan baıqaýda bilim alýshylar jas erekshelikterine qaraı baq synady. Olar «ádebıet» portaly ınternet jobasynda jarııalanǵan qazaqstandyq jáne sheteldik ádebı kitaptardy siltemeler arqyly oqydy, jańa turpattaǵy ádebıetti kóńilderine toqydy. О́zderi oqyǵan kitaptar boıynsha ustazdar tarapynan berilgen tapsyrmalardy tas-túıin oryndaǵan úzdik oqýshylar júldeli oryndarǵa ıe boldy.
Kórkem ádebıetke den qoıǵan 27 bala júldegerler qatarynan kórindi. Atap aıtar bolsaq, 4 oqýshy qatarynan oza shaýyp, jeńimpaz atansa, 8 oqýshy ekinshi orynǵa, 15 oqýshy úshinshi orynǵa laıyq dep tanyldy.
«Kórkem ádebıet qaı kezde de bizdi qanattandyrady. Árbir shyǵarmadaǵy keıipkerlerdiń minez-qulqy, qalamgerlerdiń jazý sheberligi, taqyryptyń ózektiligi bizdiń zamandastardy oılandyrmaı qoımaıdy. Barlyq bilim ataýly kitapta ekenin jaqsy túsinemiz. Bilim izdegenniń ozatynyn, búlik izdegenniń tozatynyn sezinemiz. Sondyqtan da osyndaı baıqaýlar jıi uıymdastyrylyp tursa odan eshkim utylmaıdy», deıdi baıqaýda júlde alǵan úzdik oqýshylar júzderi bal-bul janyp.
Jambyl oblysy
