Avtorlyq quqyq ıeleri Mıras Aıtbek pen Danııal Moldybekov birlesip, Abaı óńiriniń mádenı-tarıhı muralarynyń ınteraktıvti kartasyn ázirlep shyqty. Atalǵan karta arqyly saıahatshylar qasıetti ólkeniń tarıhı oryndary týraly úsh tilde aqparat ala alady.
«Kartamyz ázirge maket túrinde jasaldy. Dese de saıahatshyǵa qajetti aqparattyń barlyǵyn qamtydyq dep aıta alamyn. Nege deseńiz, Semeı –Qaraýyl kúre jolynan bastaý alatyn karta marshrýtynda Kúshikbaı asýynan Bórilidegi M.Áýezov murajaı-úıi, Qasqabulaq, Oıqudyq, Eńlik-Kebek úńgiri, Eraly jazyǵy, Áıgerim qystaýy, Jıdebaıdaǵy memorıaldy keshenge deıingi tarıhı-mádenı oryndar jaıly mol maǵlumat beredi. Bizdiń kartamyzdyń artyqshylyǵy – saıahatshyǵa yńǵaıly bolý úshin qazaq, orys, aǵylshyn tilderinde aqparattar júkteldi. Al osy aqparattardy oqymaı, tyńdaǵysy keletinder úshin aýdıo jazba engizdik. Demek, ózine kerek aqparatty ártúrli áleýmettik jeliden izdeýdiń qajeti joq. Barlyǵy bir jerge toptastyrylǵan bizdiń kartany paıdalansa bolǵany», dedi joba avtorlarynyń biri Mıras Aıtbek.
Shákirtterdiń ǵylymı jetekshisi, tarıh pániniń muǵalimi Maqsat Qudageldınniń sózine súıensek, jas zertteýshiler atalǵan jobamen birazdan beri aınalysyp keledi.
«Ustaz bolǵan soń shákirtterimizdiń osyndaı izdenisterine únemi qoldaý bildirip otyrǵan durys. Biz baǵyttaýshymyz. Qajet bolǵan jaǵdaıda tıisti kómegimizdi kórsetemiz. Endi bizdiń aldymyzda jobany jetildirý jumystary tur. Endigi maqsatymyz – karta maketin tolyqqandy saıtqa aınaldyryp, onyń ǵalamtorsyz jumys isteýine jaǵdaı týdyrý», dedi ǵylymı jetekshi. Jas zertteýshiler ınteraktıvti karta jasaý ıdeıasy ulylar ólkesiniń oblys mártebesin alýyna baılanysty týyndaǵanyn, sondaı-aq jańa jobany sol qýanyshqa qosqan syıy ekenin jetkizdi.
Abaı oblysy
