Halyqaralyq pándik olımpıadalardyń jeńimpaz 27 oqýshysy 73 mln teńgeden astam qarajat aldy. Oqýshylardy bilim nárimen baptaǵan ustaz-tálimgerleri de birjolǵy aqshalaı tólemge ıe bolady. Bul týraly Oqý-aǵartý mınıstrligi Telegram arnasynda habarlady. Ozat oqýshylar bilimderiniń arqasynda tapqan syıaqylaryn qalaı jumsaıtyndyqtaryn da jasyrmaǵan.
«Bıyl osyndaı bedeldi olımpıadaǵa alǵash ret qatystym. Oǵan kóp daıyndaldym. Árıne, Oqý-aǵartý mınıstrliginiń el ishinde ótkizgen olımpıadalary arqyly elimizdi álemdik arenada laıyqty kórsetýge múmkindik aldym. Elimizdi abyroımen tanyta alǵanyma qýanyshtymyn. Geografııadan qatysqan olımpıadada jeńiske jetkenim úshin alǵan aqshamnyń bir bóligin depozıtke salýdy josparlap otyrmyn. Qalǵanyn ata-anama beremin. Mundaı aqshalaı marapattar bizge úlken ynta-jiger, motıvasııa beredi, kelesi jyly báseke budan da joǵary bolatynyna senimdimin. Aldaǵy jyly osy olımpıadaǵa taǵy da qatysqym keledi», deıdi geografııadan halyqaralyq olımpıadanyń (IGeO) altyn júldegeri Sanjar Hamıtov.
Jeńis tuǵyrynan kóringen qalǵan oqýshylar da alǵan júldelerin depozıtke salyp, ózderine qajetti syılyqtar satyp alatynyn aıtady, qalǵan tabystaryn ata-analaryna bermek. Memleket basshysynyń tapsyrmasyn oryndaý aıasynda Oqý-aǵartý mınıstrligi halyqaralyq pándik olımpıadalardyń jeńimpazdaryna 1,5 mln-nan 4,5 mln teńgege deıin syıaqy taǵaıyndaǵan. Buǵan deıin Oqý-aǵartý mınıstri Ashat Aımaǵambetov aıtqandaı, bıyl tizimge 7 olımpıada kirse, kelesi jyly ol taǵy 7 olımpıadamen tolyǵady.
Osylaısha, 2022 jyly ulttyq qurama el qorjynyn 3 altyn, 15 kúmis jáne 9 qola medalmen tolyqtyryp otyr.
