Halyq tilegi qabyl bolǵan kún

Áýeli merekeniń shymyl­dy­ǵy Kóksý aýdanyna qa­rasty Z.Tamshybaeva aýy­lynda túrildi. Shańyraq­taryna kópten kútken kógildir otynnyń kelýi turǵyndardyń kó­ńilin shat-shadyman etti. Tabıǵı gazǵa 400-ge jýyq otbasy qol jetkizdi.

Odan keıin Eskeldi aýdanynda 1 900-ge jýyq adam turatyn Abaı, Terekti jáne Qorjymbaı aýyldarynda úsh blok-modýldik medısınalyq pýnkt ashyldy. Úsh nysannyń jalpy quny 105 mln teńgeni quraıdy. Ár feldsherlik pýnktte akýsher-gınekologter men feldsherler turaqty jumys isteıtin bolady. Oblys ortalyǵynan mamandardyń kelýi de uıymdastyrylmaq.

Atalǵan qurylys nysanyna otandyq óndiristen metall konstrýksııalar men sendvıch-panelder paıdalanylǵan. Ishinde ystyq sý, ájethanasy bar. Ǵımarattar qaıta jón­deýdi qajet etpeıdi. Maman­dar 30 jyldan 50 jylǵa deıin kepildik berip otyr. Mine, osylaısha, blok-modýldik feldsherlik pýnktter aýyl turǵyndaryna medısınalyq qyzmettiń qoljetimdiligi men sapasyn arttyrý másele­sin qysqa merzimde sheshýge múm­kin­dik bermek. Bul ǵıma­rattar qurylystyń jyldamdyǵy ǵana emes, sapasymen de erek­shelenedi. Sonymen qatar jobalyq-smetalyq qujat­tar ázirleýdi qajet etpeıdi.

Osyndaı áleýmettik nysan Alakól aýdanyna qaras­ty Eńbekshi aýylynda da boı kóterdi. Bir myńnan astam halqy bar eldi mekenge mo­dýl­di dárigerlik ambýlatorııa aýadaı qajet bolatyn. Qara­paıym halyq bir jasap qaldy. Zamanaýı qural-jabdyqtarmen jabdyqtalǵan densaýlyq saqtaý nysanynyń jalpy quny 78 mln teńgeni quraıdy. Ǵımarattyń jalpy aýdany – 110 sharshy metr. Ǵımarat bir qabattan, jeti bólmeden turady. Dárigerlik ambýlatorııa 8 adamdy ju­mys­pen qamtıdy. Sondaı-aq Kóksý aýdanynda da 1 500-den astam adam turatyn Jambyl aýyly halqynyń ıgiligine feldsherlik-akýsherlik pýnkt­ paıdalanýǵa berildi.

Odan bólek Sarqan qala­syn­da zamanaýı sport nysany ashyldy. Aqyn Sara atyndaǵy orta mekteptiń stadıony qoldanysqa berildi. Onyń qurylysyna jergilikti bıýdjetten 59 mln teńge jum­salǵan. Jyl sońyna deıin Sarqan aýdanynda barlyǵy 4 fýtbol stadıony, 8 balalar oıyn alańy jáne 5 vorkaýt-alań iske qosylmaq. Merekege oraı aýdanda engizilgen taǵy bir nysan – «sıfrlyq keńse» bólimshesi boldy. Bul keńsege kúnine 100-ge jýyq adam bara alady.

Qýanyshtyń úlkeni Úsh­tóbe qa­lasynda boldy. Ult­tyq merekege oraı 30 pá­ter­­li baspananyń kilti ta­bys­­taldy. Saltanatty is-shara­ǵa aýdan ákimi Erlan Isabekov, Úshtóbe qalasynyń turǵyn­dary jáne merdiger mekeme ókilderi qatysty. Turǵyn úı «Nurly jer» memlekettik baǵ­dar­lamasy aıasynda salyn­ǵan. Úı qurylysyna 405,6 mln teńge jumsalǵan. Jańa úıde 2 bólmeli 10 páter jáne 3 bólmeli 20 páter bar. Qonys toı ıeleri qata­ryn­da 20 páterge – 1 jáne 2-top­taǵy múgedekter, Aýǵan soǵysynyń ardagerleri, to­lyq emes otbasylar, zeınetkerler, múgedek balalardy tárbıelep otyrǵan otbasylar sanatyndaǵy azamattar ıe boldy. Sonymen qatar 5 páter jetim balalarǵa, 5 pá­ter kópbalaly otbasylarǵa buıyrdy. Aýdan basshysy turǵyndardy qonys toıymen quttyqtap, aýdanda jaqyn arada 40 páterli kommýnaldyq úıdiń qurylysyn bastaý, sondaı-aq «Kókdala» shaǵyn aýdanynda 20 jańa turǵyn úı salý josparlanyp otyrǵanyn qýanyshpen jetkizdi.

Jetisý oblysy