Byltyr Azııa damý banki ınstıtýty janyndaǵy zertteýshiler toby Ortalyq Azııa elderindegi transporttyq ınfraqurylymnyń saýda salasyna tıgizer áserin zerdelep kórgen. Soǵan súıensek, transporttyq ınfraqurylym sapasynyń 1 paıyzǵa jaqsarýy Qazaqstan, Qyrǵyzstan jáne Tájikstandaǵy eksportty – 9,15 paıyzǵa, al ımportty 5,12 paıyzǵa arttyrady eken. Temir jol men áýe joly sapasynyń artý eksportty – 5,16, ımportty 7,83 paıyzǵa kúsheıtetin kórinedi.
Jalpy, ınfraqurylym sapasy jóninen óńirdegi kóshbasshy el – Qazaqstan. Dúnıejúzilik banktiń málimdeýinshe, bizdiń elde jol jaıy túzelip, adamdardyń jumysqa qolaıly ári tez jetýi 1 paıyzǵa jaqsarar bolsa, onda kompanııa men jumys oryn sany 0,3-0,4 paıyzǵa kóbeımek. Degenmen bul maqtanarlyq kórsetkish emes. Úlken ólshemmen alǵanda úzdik sapanyń aýylynan alyspyz. Búkilálemdik ekonomıkalyq forým jasaıtyn jahandyq básekege qabilet ındeksi boıynsha, Ortalyq Azııa elderi áli tómengi oryndarda. Naqtylaǵanda, Qazaqstan – 73, Tájikstan – 111, Qyrǵyzstan 129-orynda tur. Bul turǵyda úzdik el – Sıngapýr. Eń nashar el – Iemen (141-oryn).
Aıtyp otyrǵan ındeksimiz tek transporttyq ınfraqurylymda emes, joldyń sapasyn bólek baǵalaıdy. Bul boıynsha Qazaqstannyń pozısııasy tipti tómen – 115-oryn. Osydan biraz ýaqyt buryn otandyq telearnaǵa suhbat bergen «QazAvtoJol» kompanııasynyń resmı ókili Lázzat Stamǵazıeva «Jaqsy nemese jaman jol degen túsinik joq. Statıstıka boıynsha, Qazaqstan joldarynyń 20 paıyzy qanaǵattanarlyq jaǵdaıda emes, 80 paıyzynyń jaǵdaıy jaqsy», dep aıdy aspanǵa shyǵardy.
«Joldyń jaıyn júrgen biler» deıdi qazaq. Búkil Qazaqstandy shyr aınalmaı-aq, Almaty men Astana, Qyzylorda men Jezqazǵan arasyn jol qylǵan aǵaıyn aıtar, aıtyp ta júr ǵoı, joldyń qandaı kúıde ekenin... Tipti qala ishindegi (Astana, Almaty jáne basqa da negizgi qalalar) joldardyń ózi oıdym-oıdym. Qııalǵa basyp, joldy jóndemeý, ne bolmasa ádeıi sapasyz etip salý – kólik bólshekterin satýmen aınalysatyn monopolııanyń múddesi emes pe deıtin ázil aralas kózqaras ta kep qalady kókeıge.
