Eńbek jáne halyqty áleýmettik qorǵaý mınıstrliginiń málimetinshe, elimizde 12 myńnan astam áleýmettik qyzmetker jumys isteıdi. Olar halyqtyń ártúrli sanattaryna ómir súrý sapasyn jaqsartý jáne kúrdeli ómirlik jaǵdaıdan shyǵý úshin kómek kórsetý maqsatynda arnaýly áleýmettik qyzmetter kórsetedi.
Qazirgi ýaqytta áleýmettik qyzmetkerler qarttarǵa, múgedektigi bar adamdarǵa, onyń ishinde balalarǵa, belgili bir turǵylyqty jeri joq, bas bostandyǵynan aıyrý oryndarynan bosatylǵan adamdarǵa, turmystyq zorlyq-zombylyq pen adam saýdasynyń qurbandaryna arnaýly áleýmettik qyzmetter (AÁQ) kórsetedi.
Áleýmettik qyzmetkerdiń negizgi mindetteri – qyzmet alýshylardy ózine-ózi qyzmet kórsetý, ózin-ózi baqylaý, qarym-qatynas daǵdylaryna úıretý. Sondaı-aq áleýmettik qyzmetkerler otbasy múshelerimen ońaltý is-sharalaryn iske asyrý jáne qyzmet alýshylardyń qoǵamda ózderin beıimdeý boıynsha jumys júrgizedi, áleýmettik tólemder men basqa da áleýmettik qoldaý sharalaryn alýǵa járdemdesedi.
Áleýmettik qyzmetkerler stasıonar, jartylaı stasıonar jaǵdaıynda, úıde jáne ýaqytsha bolý uıymdarynda AÁQ usynady.
12 myń áleýmettik qyzmetkerdiń 884-i medısınalyq-áleýmettik mekemelerde, onyń ishinde 695-i stasıonarlyq mekemelerde, 189-y ońaltý ortalyqtarynda qyzmet kórsetedi. Úıde áleýmettik kómek kórsetý bólimshelerinde 11 395 áleýmettik qyzmetker, belgili bir turǵylyqty jeri joq adamdarǵa arnalǵan áleýmettik beıimdeý ortalyqtarynda – 65, daǵdarys ortalyqtarynda 65 áleýmettik qyzmetker jumys isteıdi.
Sonymen qatar áleýmettik qyzmetkerlerdiń 45%-y aýdan ortalyqtary men qalalarda, 30%-y oblys ortalyqtary men respýblıkalyq mańyzy bar qalalarda, 25%-y aýyldyq okrýgterde qyzmet kórsetedi.
2021 jyldyń qorytyndysy boıynsha memlekettik jáne úkimettik emes sektorlarda arnaýly áleýmettik qyzmetpen 116 myńnan astam adam qamtyldy.
Bıyl áleýmettik qyzmetkerlerdiń minez-qulqynyń kásibı etıkasynyń normalary bekitildi. Bul olar usynatyn qyzmetterdiń sapasyn arttyrýǵa yqpal etetin bolady. Sonymen qatar Áleýmettik kodeks jobasynda halyqqa áleýmettik qyzmet kórsetý júıesin odan ári jańǵyrtý kózdelgen. Qoldanystaǵy arnaıy áleýmettik qyzmetter ózektendiriledi jáne jańa standarttar ázirlenedi, al áleýmettik qyzmetke muqtaj adamdarǵa áleýmettik qyzmetkerlerdi tańdaý múmkindigi beriledi. Budan basqa, áleýmettik qyzmetkerler tizilimin qurý josparlanyp otyr, onda olardyń biliktiligi, kórsetiletin qyzmetterdiń túrleri men sapasy, jumys nátıjeleri týraly aqparat qamtylady.
Áleýmettik qyzmetkerler úshin kásiptik standarttar ázirlenedi, onda jumys berýshilerdiń oqytý personalynyń bilimi, daǵdylary jáne biliktilik deńgeıine qoıylatyn talaptary kórsetiledi. Usynylatyn qyzmetterdiń biliktilik deńgeıin, sanaty men ereksheligin eskeretin eńbekaqy tóleýdiń jańa júıesi ázirlenbek.
