Syr óńiriniń qubyr zaýyty óz ónimderin eksportqa shyǵarýǵa qulshynyp otyr

ASTANA. 27 mamyr. Osydan 3 jyl buryn «Údemeli ındýstrıaldy-ınnovasııalyq damý» jobasy aıasynda iske qosylǵan Qyzylorda oblysyndaǵy qubyr zaýyty ónimderin eksporttaýǵa saqadaı-saı. Bul týraly «24kz» habarlady. Búginde ishki suranysty tolyqtaı qanaǵattandyryp otyrǵan kásiporynnyń áleýeti syrtqy naryqty da qamtamasyz etýge jetedi. Bu kásiporynnyń negizgi shıkizaty – polıetılen. Zaýyt qubyrlarynyń bir bóligi kommýnaldyq sala, gaz júıelerine qoldanylýda. Sondaı-aq, munda polıvenılhlorıd qubyrlary da shyǵarylady. Zaýyt ınjeneri Nurbek Nurmuhamedov: «Barlyq jumys kompıýtermen basqarylady. Injener-tehnologtar tapsyrystyń barlyǵyn naqty belgilep otyrady. Zaýyttyń jyldyq ónimi 16 myń tonna shamasynda. Bul óndiristiń 70 paıyzdyq qýattylyǵyna para-par. Joba iske asqan 3 jyldyń ishinde el suranysyn ótep keledi. Sońǵy ýaqytta kedendik kedergilerdiń jeńildep, alys-beristiń arta túsken shaǵynda kásiporyn óz ónimderin eksportqa baǵyttaýǵa nıetti», – dedi. Al, zaýyt dırektorynyń orynbasary Arman Ábdiqadirovtyń aıtýynsha, bul kásiporyn Qazaqstan, Reseı, Belarýs memleketteri qatysyp otyrǵan Biryńǵaı ekonomıkalyq keńistik naryǵynan tapsyrys kútip otyr. Zaýyt berilgen tapsyrysty  100 paıyzǵa oryndap shyǵýǵa qaýqarly. Kásiporyn óniminiń sapasy zaman talabyna saı. Joldybaı Bazar. Derekkóz: «24kz». Foto: today.kz.