Taraz qalasynda ornalasqan «Qazfosfat» JShS-ǵa qarasty mıneraldy tyńaıtqyshtar óndiretin «Ammofos-2» sehynyń áleýeti qandaı? Derekterge súıensek, jańadan ashylǵan seh taǵy da 500 adamdy jumyspen qamtýǵa qaýqarly.
«О́ńirde ashylǵan jańa seh Jambyl oblysy úshin ǵana emes, jalpy elimiz úshin de úlken óndiris alańyna aınalady. Jalpy, Jambyl óńirinde qolǵa alynǵan aýqymdy jumys oń nátıjesin berip otyr. Sonyń nátıjesinde sońǵy birneshe jylda agrohımııa salasyndaǵy óndiriletin ónim kólemi eselep ósti. О́zge memleketterge jóneltilip jatqan ónim kólemi 1,8 esege artqanyn da aıta ketken lázim.
Bul rette jambyldyq eńbekkerlerdiń eseli eńbeginiń zor ekenin aıryqsha atap ótken durys. Jańa óndiris sehy ónim kólemin burynǵydan da eseleı túsetini talas týdyrmasa kerek. Elimiz boıynsha atqarylyp jatqan iri jobalardyń bir bólshegi qasıet daryp, qut qonǵan Áýlıeta óńirimen tyǵyz baılanysty bolyp turǵany qýantady. Jalpy, seriktestiktiń el ekonomıkasyn órkendetýde ózindik orny bar ekenin bárimiz bilemiz», deıdi Indýstrııa jáne ınfraqurylymdyq damý mınıstri Qaıyrbek О́skenbaev.
О́ńir basshysy Nurjan Nurjigitovtiń aıtýynsha, «Qazfosfat» JShS qyzmetkerleriniń qolǵa alǵan jumys aýqymy óte zor. Bul óz kezeginde óńir ekonomıkasynyń órkendeı túsýine aıtarlyqtaı úles qospaq. Al óndiriletin ónim kólemi jyl ótken saıyn arta túspek. Sol baǵyttaǵy jumystar búginnen bastap naqty qolǵa alynǵan.
«Naqtyraq aıtar bolsaq, 7 myńnan astam turǵyndy turaqty jumyspen qamtyp otyrǵan «Qazfosfat» JShS óńirdegi hımııa salasyn órkendetýde úlken jumystar atqaryp jatyr. Jyldar boıy jemisti eńbek etip kele jatqan seriktestikpen qalaı maqtansaq ta jarasady. О́ńirimiz boıynsha óndirilip jatqan ónimniń 30 paıyzynyń dál osy seriktestikke tıesili bolýy – sózimizge bultartpas dálel.
Damýdyń dańǵyl jolynan adaspaǵan seriktestik aldaǵy jyldarda elimizdiń barlyq qıyryn mıneraldy tyńaıtqyshtarmen qamtamasyz etetin bolady. Búginde oblysymyzda tynbaı jumys istep jatqan myńdaǵan sharýa qojalyǵynyń basshylary da seriktestik óniminiń sharapatyn kórip otyrǵanyn aıta ketken jón. Túıip aıtar bolsaq, «Ammofos-2» sehy óńir ekonomıkasyn órkendetýde aıryqsha ról atqaratyn bolady», deıdi óńir basshysy.
Jańadan ashylǵan sehta jylyna 500 myń tonna ammafos óndirilmek. Al jalpy kásiporyndaǵy mıneraldy tyńaıtqyshtar óndirisiniń jyldyq qýaty 1 mln tonnaǵa deıin ulǵaıyp otyr. Osylaısha, jalpy quny 72 mlrd teńgeni quraıtyn seh aldaǵy ýaqytta ishki jáne syrtqy naryqty mıneraldy tyńaıtqyshpen qamtymaq.
TARAZ
