Resmı málimet boıynsha, Qazaqstanda zeınet jasyndaǵy 2,25 mıllıonǵa jýyq azamat bar. «Bul belgili bir problemalary men qajettilikteri bar adamdar. Belsendi jáne aqyl-oıy tolysqan jandar. Meniń maqsatym – amerıkalyqtar nemese qytaılyqtar sııaqty Qazaqstandaǵy osy jastaǵy azamattardyń Eýropadaǵy murajaılardy kórý úshin demalysqa shyǵýyna nemese Afrıkaǵa safarıge barýyna múmkindik jasaý. Barlyq azamattar úshin laıyqty jáne qaýipsiz qarttyq – meniń armanym», dedi Saltanat Tursynbekova.
Kandıdat ortalyqqa kelýshilermen birge sport jattyǵýlaryn jasap, áńgimelesip, tipti bı bıledi. Mundaǵy áıelderdiń densaýlyǵy jaqsy. Olar sporttyń kez kelgen túrin erkin meńgerip, qıyn degen jattyǵýlardy op-ońaı oryndaıdy. Degenmen, olardy alańdatatyn bir jaıt bar. Zeınetaqynyń azdyǵy, memleket tarapynan jaqsy áleýmettik qoldaýdyń joqtyǵy, baspana tapshylyǵy, keıbireýin jalǵyzdyq muńaıtady. Saltanat Tursynbekova ortalyq músheleriniń barlyq aryz-shaǵymdary men ótinishterin tyńdap, zeınetkerlerge kómektesý jáne turmysyn jaqsartý maqsatynda eń tómengi jalaqy men kúnkóris deńgeıin arttyrýdy (zeınetaqy jınaqtary men járdemaqylar), qıyn ómirlik jaǵdaıǵa tap bolǵan otbasylardyń qaryzdaryn joıýdy nazarǵa alatynyn jetkizdi.
