Bizdiń delegasııany Indýstrııa jáne ınfraqurylymdyq damý mınıstrligi Azamattyq avıasııa komıtetiniń tóraǵasy Talǵat Lastaev bastap bardy. Kezdesýge «Qazaqstannyń avıasııalyq ákimshiligi» AQ bas dırektory Katalın Radý da qatysty. Eýropalyq delegasııany Eýropalyq komıssııanyń ushý qaýipsizdigi bólimi basshysynyń orynbasary Pıter Sorensen basqardy.
«Kezdesý barysynda qazaqstandyq tarap ushýdy paıdalaný, ushýǵa jaramdylyq, avıapersonaldy lısenzııalaý jáne Qazaqstandaǵy ushý qaýipsizdiginiń deńgeıin jaqsartý boıynsha Qazaqstannyń avıasııalyq ákimshiliginiń prosesterin standarttaý bóliginde qabyldanǵan sharalar men iske asyrylyp jatqan túzetý is-qımyldarynyń josparlary týraly habardar etti. Onyń ishinde Qazaqstannyń avıasııalyq ákimshiligi qarjylandyrýdyń jańa tásilin engizý jáne eldegi azamattyq avıasııa salasyn retteýdiń eýropalyq modeline odan ári josparly kóshý bóliginde Qazaqstan Respýblıkasynyń qoldanystaǵy zańnamasyna kútiletin ózgerister tanystyryldy. Eýropalyq tarap júzege asyrylyp jatqan is-sharalar boıynsha Qazaqstannyń avıasııalyq bıligi qabyldap jatqan sharalardy oń qabyldady», dep habarlady Indýstrııa jáne ınfraqurylymdyq damý mınıstrligi.
Eýropalyq komıssııa delegasııasynyń basshysy 2019 jyldan bastap Qazaqstanda iske asyrylyp jatqan azamattyq avıasııany retteýdiń eýropalyq modelin joǵary baǵalap qoldady jáne bul ushý qaýipsizdiginiń eýropalyq standarttaryna tolyq sáıkes keletin álemdegi eń ozyq jáne eń tıimdi tásilderdiń biri bolyp sanalatynyn atap ótti. Sondaı-aq Qazaqstanda turaqty avıasııalyq retteýshiniń jumys isteýi jáne eldegi ushý qaýipsizdigin qamtamasyz etý jónindegi mindettemelerdi oryndaý úshin Qazaqstannyń avıasııalyq ákimshiligi resýrstaryn qarjylandyrý men qamtamasyz etýdiń jańa tetigin tıimdi iske asyrý qajettigi atap ótildi.
Sondaı-aq Eýrokomıssııa ushýǵa jaramdylyq, ushýdy paıdalaný, áýe personalyn lısenzııalaý, ushý qaýipsizdigi basqarmasy, Qazaqstannyń avıasııalyq ákimshiligi prosesterin standarttaý jáne uıymnyń jańartylǵan qurylymy salalarynda atqarylǵan jumystardyń barysyn oń baǵalap, osy baǵyttaǵy jumysty jalǵastyrýǵa shaqyrdy. Eýropalyq tarap atalǵan máselelerde jan-jaqty qoldaý kórsetýge daıyn ekendigin bildirdi.
Qazaqstannyń avıasııalyq bıligi usynǵan progress negizinde Eýropalyq komıssııa ókilderi qazirgi kúni qazaqstandyq avıakompanııalarda Eýrokomıssııanyń ushý qaýipsizdigi tizimine («qara tizim») jáne Eýropaǵa ushýǵa qandaı da bir shekteýler engizý boıynsha qaýip joq ekenin rastady.
