Sharanyń ashylý saltanatyna Astana qalasy Dene shynyqtyrý jáne sport basqarmasy basshysynyń orynbasary Erkeǵalı Davlethanuly, «Sport Qory» bas dırektory Ashat Seısembek jáne Qazaqstan jekpe-jek óneri qaýymdastyǵy federasııasynyń vıse-prezıdenti Sársen Quranbek qatysyp, jarys qatysýshylaryna sáttilik tiledi.
«О́zderińizdi búgingi taekvondo GTF boıynsha jasóspirimder men jastar arasynda Qazaqstan Respýblıkasy Kýbogynyń ashylý saltanatymen quttyqtaımyn! Astana qalasynda dástúrge aınalǵan bul jarystyń aýqymy keńeıip keledi. Búgingi jarysqa elimizdiń barlyq óńirinen 400-ge tarta jas órender qatysyp otyr. Memleket basshysynyń tapsyrmasy boıynsha buqaralyq sportqa erekshe kóńil bólýdemiz. Búgingi jarys – buqaralyq sportty damytýdaǵy úlken qadam. Osy oraıda, búgingi jarysty uıymdastyrǵan barsha azamattarǵa elimizdiń sport salasyn damytýǵa qosqan úlesteri úshin zor alǵysymdy bildiremin. Respýblıkalyq týrnırde úzdikterdiń úzdiktigi anyqtalyp, eń myqtylar jeńis tuǵyrynan kórinedi degen senimdemin», dedi qalalyq Dene shynyqtyrý jáne sport basqarmasy basshysynyń orynbasary Erkeǵalı Korbozov.
Dúbirli dodaǵa elimizdiń barlyq oblysy men qalalarynan 400-den astam sportshy qatysýda. Olar eki kún boıy ózderiniń baqtaryn synaıtyn bolady.
«Respýblıkalyq GTF taekvondo federasııasynyń uıymdastyrýymen chempıonat eki sanat boıynsha ótýde. Jarysta ártúrli deńgeıdegi belbeý ıeleri hengı – bazalyq soqqy men bloktardan turatyn formaldi keshen jáne massogı-sparrıngter boıynsha synǵa túsýde. Búgin jarysqa 15-17 jas aralyǵyndaǵy sportshylarymyz shyǵyp jatyr. Erteń kishi jas ıaǵnı, 12-14 jastaǵy taekvondoshylar doıangaǵa shyǵady. Saıysqa 40 salmaq dárejesinde 400-den astam sportshy baǵy men babyn synap kórip jatyr. Atalmysh jarysta tek birinshi oryn ıelengen sportshy keler jyly ulttyq quramaǵa alynady. Sonymen qatar bul Qazaqstan kýbogy aldaǵy jarystar men chempıonattarda sportshylarymyzdyń daıyndyǵyn shyńdaı túsýge múmkindik berdi», deıdi qalalyq GTF taekvondo federasııasynyń dırektory Svıatoslav Janovıch.
Esterińizge sala keteıik, atalǵan is-shara elordamyzda 2-4 qarasha aralyǵynda ótýde. Qazaqstan Respýblıkasynyń kýbogy eki jas sanatynda ıaǵnı, 12-14 jas jáne 15-17 jas aralyǵynda ótýde. Sonymen qatar bul týrnırde úzdik tehnıka men áserli jekpe-jekterge kýboktar beriledi dep josparlanýda.
