Elordada halyq sanynyń kúrt artýy qurylys qarqynyn kúsheıte túsetini túsinikti. Mundaı jaǵdaıda oqýshy kóbeıip, oqý oryndarynda oryn tapshylyǵy birden baıqalady. Ulttyq statıstıka bıýrosynyń málimetinshe, Astana qalasy boıynsha turǵyndar sany 2022 jyldyń basynda 1 295 711 adamdy, al 2022 jyldyń 1 qazanynda 1 340 782 adamdy quraǵan.
«Memleket basshysynyń tapsyrmasy boıynsha «Jaıly mektep» ulttyq jobasy aıasynda 23 iri mekteptiń jobasyn júrgizip jatyrmyz. Bul 23 mektep eki aýysymda 84 myńnan astam oqýshyny qamtýǵa múmkindik beredi. Atalǵan joba aıasynda bilim oshaqtarynyń qurylysyn kelesi jyly bastaımyz. Osylaısha, biz aýqymdy mektepter salýdy jalǵastyramyz. Buǵan deıin Astanada 6 iri mektep ashtyq, onyń árqaısysy 4 myń oqýshy ornyna (6 mekteptegi oqýshy oryndarynyń jalpy sany – 2 aýysymda 24 myń) eseptelgen. Qalany aralaý barysynda birqatar mekteptiń qurylys barysymen tanystym. Mysalǵa bul mektepter Uly dala dańǵylynda, Uly dala men Saýran dańǵylynyń qıylysynda, Qarasaı batyr jáne 187 kóshede ornalasqan. Osy mektepterdi bıylǵy oqý jylynda ashýdy josparlap otyrmyz», deıdi Altaı Kólginov.
Qazirgi ýaqytta belgilengen mektep salynatyn 102 jer ýchaskesi áleýmettik nysandardyń qajettilikterine oraı qalanyń barlyq aýdanynda ornalasqan. Máselen, elorda turǵyndary kóbirek shoǵyrlanǵan jáne qarqyndy damyp kele jatqan Esil aýdanynda – 49, Almaty aýdanynda 29 ýchaske bar. Taǵy basqa mektepter men áleýmettik mańyzdy nysandar salý úshin de jer ýchaskeleriniń sany jyl saıyn ulǵaıtylmaq. Sondaı-aq ár aýdanda (shaǵyn aýdandarda) oqý oryndary bolýy úshin egjeı-tegjeıli josparlaý jobasyna (ETJ) arnaıy baǵyt bekitilgen.
Qala ákiminiń aıtýynsha, elordada 2019 jyldan bastap 93 myń oqýshy ornyna arnalǵan eki aýysymda 45 mektep salynǵan.
