Keıipkerimiz Aralbaı Mámbetjanov Qazaly aýdanyndaǵy Maıdakól aýylynda turatyn tis dárigeri. Aýylda tursa da áleýmettik jeli men merzimdi baspasóz arqyly qoǵamdaǵy úlkendi-kishili oqıǵalarǵa ún qosyp otyratyn azamat.
Kesh bilip júrgen biz eken, aýyl dárigeriniń aıtýynsha, sońy qaıǵyly aıaqtala jazdaǵan oqys jaǵdaı osy jylǵy tamyz aıynda bolypty. Osyndaǵy erli-zaıyptylar jaqyndary qaıtys bolyp, soǵan kóńil aıtýǵa ketedi. Qaladaǵydaı qurdaı qatynap jatqan kólik bolmaǵan soń da aýyldaǵylardyń alańy azdaý ǵoı. Sonda da úıdegi bir jarym jasar kishkentaıdy eresekterge tapsyryp ketipti. Kúnde bolmasa da inilerine jıi bas-kóz bolyp qalatyn estııar eki ul da alańsyz oınap, kishkentaıdy kózden tasa qylyp alsa kerek. Barǵan jerinen tez oralǵan áke-sheshesi 1,5 jasar balanyń úıge jaqyn jarmada aǵyp bara jatqanyn bir-aq kóredi ǵoı.
– Balanyń sheshesi maǵan telefon shalyp, baladan tirshilik belgisi baıqalmaıtynyn habarlady, – deıdi Aralbaı Aıaǵanuly. – Dereý jettim, shynymen de sál keshiksek baladan aıyrylyp qalǵandaı ekenbiz. Tez arada es-tússiz jatqan sábıdiń sý kıimderin sheshkizip, qarysqan aýzyn ashyp, tiliniń ushynan basyp turyp jutqan sýyn qustyrdym. Tunshyǵyp qalǵan bala birden shar etip jylap qoıa berdi. Jedel jasandy dem berip, júrekke janama massaj jasap, aıaq-qolyn ýqalap, aýdandyq aýrýhanaǵa attandyrdyq.
Eńbek jolyn jańa bastaǵan maman bolsa, mundaı sátte abdyrap qalar ma edi, sábıdi saqtap qalam degen dáriger birinshi tájirıbege súıendi. Aýrýhanaǵa jetkenge deıingi 60 shaqyrymdyq joldy ýaıymdap, tynym tappaı ketken ol «bala jansaqtaý bólimine qabyldandy» degen habar jetkende arqasynan aýyr júk túskendeı bolǵan edi. Aýrýhanada em alǵan sábı az kúnde saýyǵyp, úıine oraldy.
Osydan eki jyl burynǵy pandemııa kezinde Aralbaı Aıaǵanulynyń aýyl syrtyndaǵy beketten Astanadan kele jatqan azamattyń boıynan dert belgisin baıqap, dabyl qaqqan eken. Onyń boljamy dál shyǵyp, naýqas der kezinde oqshaýlandyrylypty. Jýyrda aýyl dárigeri «Qurmet» ordenimen marapattaldy.
Keıde dáriger qyzmetinen min tapsaq, «oý, sonda Gıppokrat serti qaıda qaldy?» dep jatatynymyz bar. Ásili, aq halat kıgen mamannyń kásibıligi sertpen emes, jaqsylyq jasaýǵa asyqqan nıetpen, qıyn sátte qaımyqpaıtyn júrekpen ólshense kerek.
Qyzylorda oblysy
