Shara Qazaqstan Respýblıkasynyń Qyrǵyz elindegi elshiliginiń jáne Jambyl oblysy ákimdiginiń qoldaýy negizinde «Otandastar Qorynyń» uıymdastyrýymen ótýde.
Qazaq-qyrǵyz elderi ejelden-aq tamyry tereń tatý kórshilik ornatyp, baıaǵydan-aq barys-kelis pen alys-beris aıasy anaǵurlym keńeıgen múddeles memleketter ekeni beseneden belgili.
Qyrǵyzstan - biz úshin tamyrlas, taǵdyrlas jáne baýyrlas memleket. Eki el arasynda saýda-ekonomıkalyq, ınvestısııalyq jáne mádenı-gýmanıtarlyq saladaǵy yntymaqtastyq aıasy keńeıe túsýde. Elderimiz aımaqtyq jáne jaHandyq máselelerde ózara yqpaldastyq pen yntymaqtastyqqa asa mańyz berýde.
Sonyń arqasynda qazir qazaq-qyrǵyz qatynasy jańa deńgeıge kóterildi deýge tolyq negiz bar.
El tynyshtyǵy men turaqtylyqty, Qyrǵyzstandy meken etken halyqtar arasyndaǵy dostyq, yntymaqtastyq qatynastardy nyǵaıta túsýge Qyrǵyzstandaǵy qazaq qaýymdastyǵy da zor septigin tıgizip júr.
Merekeli mereıtoı aıasyndaǵy alǵashqy is-shara Qyrǵyz Respýblıkasynyń Alyqul Osmonov atyndaǵy Ulttyq kitaphanasynda «Qazaqstan-Qyrǵyzstan: 30 jyldyq dostyq pen yntymaqtastyq» atty otyryspen bastaldy. «Dóńgelek ústel» formatynda ótken kezdesýdiń basty sebebi - azattyqtyń aq tańymen qatar kelgen «Qyrǵyzstan qazaqtary qaýymdastyǵynyń» 30 jyldyq mereıtoıy bolǵandyqtan aýqymy keń is-shara ejelden enshisi bir egiz halyq - qyrǵyz baýyrlarmen birlese uıymdastyryldy.
Dóńgelek ústel Qyrǵyzstan Respýblıkasy Mádenıet, aqparat, sport jáne jastar saıasaty Mınıstriniń quttyqtaýymen bastaldy.
Sonymen qatar Qazaqstan Respýblıkasynyń Qyrǵyz Respýblıkasyndaǵy Elshisi Rápil Seıthanuly - Bıyl Táýelsiz el retinde Qazaqstan men Qyrǵyzstan arasyndaǵy dıplomatııalyq qarym-qatynastyń 30 jyldyq merekesi ultymyzdy uıystyrǵan Qaýymdastyqtyń mereıtoıymen tuspa-tus kelip otyrǵanyna toqtaldy.
Qazaqstandyq delegasııany bastap barǵan «Otandastar qorynyń» Prezıdenti Abzal Saparbekuly osy mereıtoıdyń joǵary deńgeıde atap ótilýine aıryqsha yqylas bildirgen Qyrǵyzstan basshylyǵyna, Qyrǵyzstannyń Halyqtar Assambleıasyna, Qazaqtar qaýymdastyǵyna, qoǵamdyq uıymdarǵa, janashyr aǵaıyndar men belsendi qandastarǵa rııasyz rızalyq bildirip, aqjarma alǵysyn aıtty.
Abzal Saparbekuly óz sózinde bir-birine degen osyndaı ystyq yqylasty qatynastyń irgesin qalyptastyrǵan Muhtar Áýezov, Shyńǵys Aıtmatov, Muhtar Shahanov syndy eki ulttyń uly tulǵalary ekenin maqtanyshpen atap ótti.
О́z kezeginde jyly lebiz bildirgen Qyrǵyzstan Halqy Assambleıasynyń tóraǵasy, ataqty akademık Abdyǵanı Erkebaıuly Erkebaev ta ejelden tatý eki eldiń arasyndaǵy berik dostyqtyń tarıhı tamyry tereń ekenin tebirene jetkizdi. О́ziniń de qazaq dostary kóptigin maqtan tutyp, olardyń jaqsy qasıetterin dáriptedi.
Qazaqstannyń Eńbek Eri, Halyq jazýshysy, Qazaqstan Respýblıkasynyń Qyrǵyzstandaǵy tuńǵysh Elshisi, Qyrǵyz Respýblıkasynyń halyq aqyny Muhtar Shahanovtyń jan terbeter jaqsy sózderi eldi eriksiz eljiretti. «Adamzattyń Aıtmatovy» atanǵan Shyńǵys dosym fánıden baqıǵa ozǵaly janym jabyrqap, jalǵyz qalǵandaı kúı keship júrmin» degen bir aýyz sóziniń ózi tonnyń ishki baýyndaı, birge týǵan baýyrdaı eki eldiń egizdeı úılesiminiń úlgisi boldy. Jasampaz halyqtardyń jarqyn bolashaǵy jastardyń qolynda ekenin aıtqan aqıyq aqyn óskeleń urpaqqa óleńdete bata berdi.
Tuǵyrly tulǵadan keıin sóz alǵan taraptar tatý kórshilik saıasatyn damýdyń jańa satysyna kóterý jóninde keleli sóz qozǵap, oı-pikirlerin ortaǵa saldy. Jaıma shýaqty áńgime aýanymen aıaqtalǵan jıyn sońynda alys-jaqyn shet elderdegi qalyń qazaqtyń qamyn oılaıtyn «Otandastar qorynyń» basshysy Abzal myrza kórshiles eldegi qandastar qaýymyna atajurttyń atynan arnaıy «Qorjyn» toptamasyn tartý etti. Esten ketpes estelik retinde qazaqtyń qasıetti dombyrasynan bastap, ulttyq kıimder, baǵaly kádesyılar usynyp, ulttyq qundylyqtarymyz taǵy bir ulyqtaldy.
Kezdesýde arqa-jarqa kóńilmen jarasa qaýyshyp, qýana tarasqan qandastar men kóńili tatý kórshimiz - qyrǵyz aǵaıyndar keshkilik shekaralas Jambyl oblysynyń Kenen Ázirbaev atyndaǵy fılarmonııasy ónerpazdarynyń mereıtoıǵa arnaıy ala kelgen án-shashýyn tamashalady. Tarazdyq sahna sańlaqtary mereıtoı qonaqtarynyń meıirin qandyryp, qandastarymyzdyń abyroıyn asyrdy.
Sonymen qatar, konserttik baǵdarlama aıasynda Qyrǵyz Mádenıet, aqparat, sport jáne jastar saıasaty Mınıstriniń orynbasary - Samat Bekturuly Shatmanov, Jogorký Keneshtiń Halyqaralyq ister, qorǵanys, qaýipsizdik jáne kóshi-qon komıtetiniń tóraǵasynyń orynbasary Lýrova Leıla Hııanovna sóz sóılep rııasyz alǵystaryn bildirdi.
Bishkek qalasyn qazaqtyń halyq ánderimen áldılep, qyrǵyz aspanyn kúı kúmbirimen terbetken óner keshi kópshiliktiń jadynda jattalyp, kórermen kóńilinde kópke deıin saqtalyp qalary anyq.
