«Búgin Memleket basshysy 16 naýryzda el halqyna arnalǵan Joldaýynda aıtylǵan saıası bastamalaryn júzege asyrýǵa baǵyttalǵan alty zańǵa qol qoıdy. О́zderińizge málim, Qasym-Jomart Toqaev Prezıdent bolyp saılanǵaly beri saıası qaıta qurýlardy kezeń-kezeńimen dáıekti túrde júzege asyryp keledi. Osy jyldar ishinde saıası reformalardyń tórt paketi iske asyrylyp, onyń aıasynda saıası prosestiń básekelestigi men transparenttiligin arttyrýǵa baǵyttalǵan 13 zań qabyldandy», dep jazdy Erlan Qarın óziniń Telegram arnasynda.
Memlekettik keńesshiniń aıtýynsha, saıası reformalardyń taǵy bir paketin Memleket basshysy naýryz aıyndaǵy Joldaýynda usyndy ony maýsymdaǵy konstıtýsııalyq referendým arqyly júzege asyrdy.
«Konstıtýsııalyq reforma – qoldanystaǵy zańnamaǵa ózgerister men tolyqtyrýlar engizýdi talap etkeni anyq. Úkimet konstıtýsııalyq ózgeristerdi kórsetetin tıisti zań jobalaryn ázirlep, qyrkúıekte Parlamenttiń qaraýyna jiberildi. Bul zańdar aldymen Májiliste muqııat jáne jan-jaqty qaralyp, maquldandy, sodan keıin Senatqa jiberildi. Búgingi tańda Prezıdent atalǵan zańdarǵa qol qoıdy. Alty zańnyń qabyldanýy Prezıdenttiń ókilettikterin bıliktiń basqa ınstıtýttaryna qaıta bólýge, bıliktiń ókildi tarmaǵyn qaıta formattaýǵa, saılaý júıesin jetildirýge, quqyq qorǵaý ınstıtýttaryn nyǵaıtýǵa, sondaı-aq memlekettik basqarý júıesin jańǵyrtýǵa ákelmek», dedi Memlekettik keńesshi.
Budan buryn Memleket basshysy bıyl maýsym aıynda ótken Konstıtýsııaǵa ózgerister men tolyqtyrýlar engizý jónindegi respýblıkalyq referendýmnan keıin qabyldanǵan birqatar mańyzdy zańǵa jarııa túrde qol qoıǵanyn habarlaǵan edik.
