Qoǵamdyq shtab músheleri zııaly qaýymmen, etnomádenı birlestikterdiń ókilderimen, pedagogtermen, stýdenttermen jáne oblystyń kópbalaly analarymen birqatar kezdesý ótkizdi. Etnomádenı birlestikterdiń ókilderimen bolǵan kezdesýde respýblıkalyq qoǵamdyq shtabtyń basshysy Erlan Qoshanov búginde kez kelgen qoǵamdy damytýdyń basty sharty kelisim ekenin atap ótti.
«Adamdar bir-birin tyńdaýdan, túsinýden qalatyn bolsa, bul kúrdeli máseleniń bastaýyna aınalady. Munyń nege ákelip soǵatynyn ártúrli elderdegi jaǵdaılardan kórip otyrmyz. Etnıkalyq tegine qaramastan, elimizdiń árbir azamatyna Konstıtýsııamen teń múmkindikke kepildik beriledi. Bul – bolashaqta da buljymaıtyn qaǵıda», dedi Erlan Qoshanov.
Búginde Qazaqstanda 130 etnos turady. Jambyl oblysynda 75 etnomádenı birlestik jumys isteıdi. Budan soń, shtab músheleri óńirdegi joǵary oqý oryndarynyń oqytýshy-professorlyq quramymen, stýdentter qaýymymen kandıdattyń saılaýaldy baǵdarlamasynyń bilim jáne ǵylym salasyndaǵy basymdyqtaryn talqylady. Ardagerlermen jáne zııaly qaýym ókilderimen kezdesýde saılaýaldy baǵdarlamada kórinis tapqan mádenıet pen ónerdi qoldaý sharalaryna basa nazar aýdaryldy.
