«Aımaqtaǵy týrızmdi damytý qajet. Qazir búkil álemde týrızm ekonomıkanyń mańyzdy salasyna aınaldy. Biz de elimizdiń týrızm ındýstrııasyn damytýǵa basa mán berip otyrmyz. Bul rette Mańǵystaýdyń alatyn orny aıryqsha.
Onyń eń utymdy tusy – Kaspıı teńiziniń jaǵasynda ornalasýy. Sonyń arqasynda jaǵajaı týrızmin damytýǵa mol múmkindik bar. Aqtaýda iske asyrylyp jatqan «Jyly jaǵajaı» ınfraqurylymdy damytý jobasy aıaqtalyp keledi. Úkimet týrızm salasyndaǵy ınvestısııalyq jobalardy qarjylandyrý múmkindigin qarastyrýy kerek», dedi Memleket basshysy Mańǵystaýǵa barǵan saparynda.
Sondaı-aq Prezıdent Kaspıı jaǵalaýyndaǵy memlekettermen birlesken halyqaralyq jobalardy júzege asyrý múmkindigin qarastyrýdy tapsyrdy. Ásirese, krýız týrızmin damytý qyzyǵýshylyq týdyratynyn aıtty.
«Jalpy Mańǵystaý kóptegen kıeli oryndarymen áıgili. Beket ata, Shopan ata, Shaqpaq ata jer asty meshitterin erekshe atap ótýge bolady. Mundaı biregeı nysandar dúnıe júzinde de biren-saran. Tarıhı-mádenı qoryqtar men mýzeılerge de basa mán bergen jón. Ásirese tól mádenıetimizde erekshe orny bar Muryn jyraýdyń jáne Serikbol Qondybaıdyń murajaıy nazardan tys qalmaýy kerek», dedi Qasym-Jomart Toqaev.
Budan soń «Arǵyqazaq mıfologııasy» atty tórt tomdyq irgeli jumystyń avtory Serikbol Qondybaıdyń ǵylymı murasy jóninde pikir bildirip, Taras Shevchenkonyń memorıaldy mýzeıin sheteldik týrısterdiń qyzyǵýshylyǵyn týǵyzatyn nysan retinde atap ótti.
