Klımattyq sammıt jumysyna 120-dan astam eldiń ókilderi qatysýda. Memleketter men úkimetter basshylary klımattyń ózgerýiniń eń ózekti máseleleri boıynsha óz elderiniń ustanymdaryn bildiretin «ulttyq úndeýler» jasady.
Álıhan Smaıylov óz sózinde Qazaqstan klımat jónindegi Parıj kelisiminiń maqsattary men mindetterin berik ustanatynyn atap ótti.
«Bizdiń elimiz 2060 jylǵa qaraı kómirtegi beıtaraptyǵyna qol jetkizý týraly barynsha bıik maqsattardy qoıyp otyr. Osynyń aıasynda jyl sońyna deıin tómen kómirtekti damý strategııasyn qabyldaý josparlanýda. Ortalyq Azııadaǵy eldiń alǵash bolyp osyndaı mańyzdy qujatty qabyldaýy tarıhı sátke aınalmaq», dedi Álıhan Smaıylov.
Onyń aıtýynsha, búginde Qazaqstanda jalpy óndiristegi «jasyl» energııanyń úlesi shamamen 3%-dy quraıdy. Bul rette ony óndirý kólemin 15%-ǵa deıin, ıaǵnı 2030 jylǵa qaraı qosymsha 7 GVt-qa ulǵaıtý josparlanýda. Sonymen qatar bıyl kómirtegi shyǵaryndylaryn kem degende 15%-ǵa tómendetý kózdelgen.
«Qazaqstannyń «jasyl» energetıkanyń álemdik ortalyqtarynyń biri bolýǵa áleýeti zor. Sondyqtan biz jańartylatyn energııa kózderin damytýdyń aımaqtyq ortalyǵyna aınalýǵa jáne jalpy Ortalyq Azııany «jasyl» tehnologııalarǵa kóshýge yntalandyrýǵa daıynbyz», dep atap ótti Premer-Mınıstr.
Osy oraıda ol elimizde «jasyl» sýtegi óndirisi men eksportyn ulǵaıtýǵa erekshe nazar aýdarylatynyn aıtty.
«Tehnologııalyq jańǵyrtýdyń mańyzdylyǵyn, onyń ishinde Parıj kelisimi sheńberinde bilim almasýdy engizý jáne «taza» tehnologııalardy berý qajettigin erekshe atap ótkim keledi», dedi Álıhan Smaıylov.
«Sondaı-aq biz jańa Ekologııalyq kodeks aıasynda sharalar qabyldap, 2025 jylǵa deıin 2 mıllıard túp aǵash otyrǵyzý sekildi aýqymdy mindetti iske asyramyz», dedi Álıhan Smaıylov.
Qorytyndylaı kele, Premer-Mınıstr búginde álemdik qoǵamdastyqtyń buryn-sońdy bolmaǵan syn-qaterlerdi bastan keshirip otyrǵanyn atap ótti.
«Osyǵan baılanysty bizge turaqty jáne teń quqyly batyl sheshimder men ádiletti damý úlgileri qajet. Qazaqstan klımattyq kún tártibindegi máselelerdiń keń aýqymy boıynsha barlyq halyqaralyq seriktestermen yntymaqtastyq ornatýǵa daıyn», dep túıindedi ol.
