Aımaǵambetov mekteptegi qaýipsizdikti qamtamasyz etý boıynsha jumystarmen tanysyp, oqý kabınetterin aralady, kitaphanada oqýshylarmen jáne kitaphanashymen áńgimelesip, áriptesterimen jumys máselelerin talqylady.
«Astanadaǵy bilim basqarmasynyń mektepterde oqýshylar saraıynyń fılıaldary men basqa da qosymsha bilim berý uıymdaryn ashý boıynsha oń tájirıbesin atap ótkim keledi. Mysaly, bul mektepte avıamodeldeý, boks, voleıbol sııaqty úıirmeler jumys isteıdi», dedi mınıstr.
Sondaı-aq «Jaıly mektep» ulttyq jobasyn iske asyrý aıasynda jańa mektepter salý josparlanyp otyrǵanyn atap ótti.
«Jaıly mektep» ulttyq jobasyn iske asyrý aıasynda jańa mektepter salý josparlanyp otyrǵan birneshe orynǵa bardyq. Bul Kereı jáne Jánibek handar kóshesindegi (árqaısysy 2 000 oqýshy orny), Tóle bı kóshesindegi (2 000 oqýshy orny) jáne Baıtursynov 7 kóshesindegi (600 oqýshy orny) mektepter», dep jazdy basqarma basshysy.
Mınıstrdiń aıtýynsha, qazir qalada 26 myń oqýshyǵa mektepten oryn tapshy. Bul máseleni sheshý úshin 2024-2025 jyldarǵa arnalǵan ulttyq joba sheńberinde eki aýysymda 85 myńnan astam oqýshy ornyn qamtamasyz etetin 24 mekteptiń qurylysyn aıaqtaý josparlanǵan. Basym kópshiligi 2024 jyly salynyp bitedi.
«Ulttyq jobany iske asyrýǵa jetekshilik etetin Astana ákimdiginiń ókilderi jer ýchaskelerin bólý, JSQ daıyndaý, ınjenerlik ınfraqurylym máselelerin sheship jatqanyn atap ketkim keledi. Bolashaqta elordada bilim berý obektilerin salý úshin 102 jer ýchaskesin bólý jónindegi sheshim de ýaqytyly qabyldandy. Prezıdenttiń jańa ulttyq jobany iske asyrý jónindegi tapsyrmasy aıasynda aldaǵy ýaqytta úshaýysymdy oqytý máselesi ǵana emes, oqýshy oryndarynyń tapshylyǵy da tolyq sheshiledi», dep jazdy mınıstr.
