«Balyq sharýashylyǵymen aınalysatyn kooperatıvterdiń tehnıkasyn jańartý qajet. Osy jerdiń aýlanǵan balyǵy Reseı, Ázerbaıjan, Izraıl sııaqty elderge eksporttalyp jatyr. Kóbine muzdatylǵan, óńdelmegen shıki balyq jiberiledi», dedi Qasym-Jomart Toqaev.
Bul rette Prezıdent óńdelmegen balyqty shetelge shyǵarýǵa shekteý qoıý múmkindigin qarastyrý qajet dep sanaıdy.
«Atyraý oblysynda bekire balyǵyn ósiretin jáne qara ýyldyryq óndiretin eki sharýashylyq bar. 2025 jylǵa deıin osyndaı taǵy 8 kásiporyn ashý josparlanyp otyr. Mundaı sharýashylyqty damytý úshin qolaıly ınvestısııalyq ahýal qalyptastyrý kerek. Sondaı-aq, osy jumystardy atqaratyn balyq sharýashylyǵynyń mamandary qajet. Jastardy osy iske baýlyp, olarǵa jan-jaqty qoldaý kórsetý óte mańyzdy. Sonda ǵana jastar bul salaǵa qyzyǵady», dep atap ótti Memleket basshysy.
Qasym-Jomart Toqaev Úkimet balyq sharýashylyǵyn damytý máselesine qoldaý kórsetý qajet ekenin qadap aıtty.
«Memleket tarapynan kómek kórsetilýi qajet. Osy aımaqta balyq sharýashylyǵyn damytý jergilikti bılik úshin basty mindettiń biri bolýǵa tıis. Úkimet bul másele boıynsha oblysqa barynsha qoldaý kórsetýi kerek», dep túıindedi Prezıdent.
