«Búgin biz birimizge aǵa, birimizge baýyr, ujymda syılasymdy áriptesimiz bolǵan QR Prezıdent Is Basqarmasy Medısınalyq ortalyǵy «OQ-JETPES» emdeý-saýyqtyrý ortalyǵynyń Prezıdenti bolǵan Qaırat Berkinbaevty aqtyq saparǵa shyǵaryp saldyq. Bul – Prezıdent Is Basqarmasy Medısınalyq ortalyq júıesindegi áriptesteri úshin ortaq, orny tolmas qaza. Jan-dúnıesi bulaqtaı taza, parasatty minezimen, tereń bilimimen, qajymas qaıratymen, adal eńbegimen aınalasyna úlgi-ónege bolǵan qadirli áriptesimizben qoshtasý rásimine Qazaqstannyń ár qıyrynan kózkórgen belgili azamattar qatysty», dep jazdy Alekseı Soı.
Sondaı-aq jazbada Qaırat Sheráliuly ómiriniń jeti jylǵa jýyq ýaqytyn ońaltý jáne emdeý-saýyqtyrý salasyna arnaǵany aıtylǵan. Ol medısınalyq ortalyq júıesindegi emdeý-saýyqtyrý ortalyqtarynyń basshysy bola otyryp, ózin daryndy uıymdastyrýshy retinde kórsete bilgen.
«Bútin bir áýlettiń ǵana emes, barsha aǵaıyn-jurtyna ǵana emes, týǵan eliniń maqtanyshyna aınalǵan asqar taýdaı áriptesimizdiń jarqyn beınesi urpaq jadynan eshqashan óshpeıdi. Halqymyzda «Jaqsynyń aty ólmeıdi, ǵalymnyń haty ólmeıdi» degen qanatty sóz bar. El keleshegi jolynda aıanyp qalmaı, abyroıly qyzmet atqarǵan tulǵanyń sońynda izdeýshisi, óreli isteri men ómirin jalǵastyrar ulaǵatty urpaǵy bar.
Biz, Prezıdent Is Basqarmasy Medısınalyq ortalyq júıesindegi qatar júrgen barsha áriptesteri Qaırat Berkinbaevtyń otbasy men jaqyn jandaryna kóńil aıtamyz. Abzal azamattyń asyl bolmysy, ardaqty esimi eshqashan umytylmaq emes, jarqyn beınesi júregimizde máńgi saqtalady», delingen jazbada.
