«Qýatty óńirler – el damýynyń draıveri» ulttyq jobasyna sáıkes 2025 jylǵa deıin jyl saıyn 3 myń páter salý jáne satyp alý kózdelip otyr. Bıyl osy maqsatta respýblıkalyq bıýdjetten 21,6 mlrd teńge qarastyrylǵan.
Satyp alý quqyǵynsyz jalǵa beriletin turǵyn úı bes jyl merzimge beriledi. Osy kezeń ishinde jastardyń óz baspanasynyń bastapqy jarnasyn jınaý múmkindigi týmaq. Al keıinnen bosaǵan turǵyn úı kelesi úmitkerlerge beriledi.
Jalpy alǵanda, 2019 jyldan beri «Nurly jer» memlekettik baǵdarlamasy sheńberinde jumys isteıtin jastarǵa elimizdegi úsh megapolıste 7 myńǵa jýyq jalǵa beriletin páter salyndy.
Sonymen qatar búginde Astana qalasynda «Elorda jastary», Almaty qalasynda «Almaty jastary», Qaraǵandy oblysynda «Qaraǵandy jastary», Jambyl oblysynda «Áýlıe ata jastary», Batys Qazaqstan oblysynda «Oral jastary», Qostanaı oblysynda «Qostanaı jastary», Almaty oblysynda «Alataý jastary», Atyraý oblysynda «Atyraý jastary» turǵyn úı baǵdarlamalary iske qosyldy. Budan bólek, Pavlodar oblysynda «Ertis jastary», Abaı oblysynda «Abaı jastary», Aqtóbe oblysynda «Aqtóbe jastary» óńirlik nesıelendirý baǵdarlamalary daıarlanýda.
О́ńirlik baǵdarlamalar jumys isteıtin jastardy turǵyn úımen qamtamasyz etýge baǵyttalǵan, sondaı-aq jergilikti bıýdjetten jáne 5 paıyz mólsherlememen jeńildetilgen. Alǵashqy jarna kólemi – 0-10 paıyzdy quraıdy. Nesıelendirý merzimi – 25 jylǵa deıin.
Aıta keteıik, atalǵan sharalar Memleket basshysynyń qoljetimdi jalǵa beriletin turǵyn úıler salý jáne jeke baspana satyp alý quraldaryn damytý týrasyndaǵy tapsyrmasyn iske asyrý maqsatynda júzege asyrylýda.
