Silkway Accelerator aıasynda jobalaryn damytý múmkindigine ıe bolǵan 13 startap baǵdarlamany sátti aıaqtap, akselerator kezinde qol jetkizgen jetistikterimen bólisti. Mysaly, Citix aqparattyq-navıgasııalyq júıesi Túrkııa men BAÁ naryǵyna shyqty. Zypl.ai startabynyń negizin qalaýshylar eki jańa naryqta – Qazaqstan men Qyrǵyzstanda satylymdy ulǵaıtyp, qunyn 6 mln-nan 10 mln dollarǵa deıin arttyrdy. Al Beyne.ai bet-álpetin taný jáne feıkti izdeý júıesi tek tehnologııalardy ázirleýden tutas ekojúıeni qurýǵa, iri kompanııalar ıntegrasııasy jáne kompıýterlik kórýdi damytýǵa kóshti.
«Bastapqyda bul jaı ǵana startaptarǵa arnalǵan kezekti qarapaıym baǵdarlama dep oıladym. Biraq qazir ómirimdegi eń jaqsy baǵdarlama dep sanaımyn. Belsendirek, sonymen birge barynsha oılasyp áreket ete bastadyq. Damýdy jedeldetetin jańa bıznes qadamdar izdestirdik. Atap aıtqanda, Amerıka, Kanada jáne Aýstralııa naryqtarynda belsendiligimiz artty», dep áserimen bólisti Smoothly LTD bas dırektory Erjan Asanov.
Onyń uıqyny jaqsartatyn Smoothly mobıldi qosymshasy «Densaýlyq jáne fıtnes» kategorııasy boıynsha Kanada men Aýstralııadaǵy App Store 100 úzdik qoldanbasynyń tizimine enip, 30 myńnan asa júktelgen.
Qatysýshylar baǵdarlama men trekerler arqyly jahandyq deńgeıde oılanyp, bıznes strategııasyn qaıta qarastyrǵandaryn atap ótti. Silkway Accelerator baǵdarlamasy aıasynda startaptar úsh aıda jaqsy nátıje kórsetti.
Akseleratordyń júrgizýshisi – ónimderdi, qyzmetterdi jáne kompanııalardy ázirleý, damytý jáne naryqqa shyǵarý boıynsha halyqaralyq keńesshi Álisher Hasanov. Onyń Rutube, Rambler, Iаndeks, Yandex.Turkey, Digital October sııaqty iri kompanııalar men basqa da áıgili akseleratorlarda jumys tájirıbesi bar.
«Bul startaptarmen jumys barysynda keremet kúıde boldym. О́ıtkeni batyl jáne senimdi qımyldaıdy. Olar – Silkway Accelerator-dyń alǵashqy túlekteri, barlyq startaptarǵa qalaı damyp, ár elderde óz pozısııalaryn qalaı nyǵaıtý kerektigin kórsetedi. Men qolymnan kelgenshe olardy sharyqtatýǵa tyrystym jáne budan da bıik asýlardy alady degen úmittemin», dedi Á.Hasanov.
Úsh aı ishinde CTOgram jobasy 230 myń belsendi avtokólik ıeleri men 2 myńnan astam jóndeý sheberhanalaryn qamtydy. Mońǵoldyq Fibo.cloud kompanııasy Mońǵolııa úkimetimen memlekettik bulttyq qyzmetterge kelisimshart jasasyp, Qazaqstandaǵy telekommýnıkasııalyq kompanııamen kelisimge qol qoıý arqyly aı saıynǵy kirisin 22 esege arttyrdy. FocusED now 15 mln teńgege kelisimshart jasasyp, naryqtaǵy ornyn tapty. iDos Games 60 myń jańa qoldanýshy taýyp, aılyq kirisin tórt esege ulǵaıtty. Naimi BAÁ naryǵyna shyǵyp, 70 tapsyrys aldy, onyń satylymy 6 myń dollardy qurady. Qyrǵyzstandyq NB Fit kompanııasy ónimin AQSh naryǵyna beıimdep, AQSh pen Eýropadan túsetin tólemderdi 20%-dan 30%-ǵa deıin arttyrdy. Al Tripsome.com akseleratordyń 3 aıyndaǵy satylymy baǵdarlamaǵa deıingi 17 aıdaǵydan asyp tústi. Sonymen qatar kompanııa Qazaqstanda veb-saıtty sátti iske qosyp, 30-dan astam jergilikti seriktestermen kelisimshartqa otyryp, alǵashqy satylymdaryn júzege asyrdy. UvU aınalymdy, kiristi jáne tapsyrystardy qosa alǵanda, negizgi kórsetkishterin 3-5 ese arttyrdy jáne baǵytyn keńeıtip, bıznes úlgisin ózgertti. Zan.bar Eýropa naryǵyna shyǵyp, óz ónimin Ulybrıtanııadaǵy 12 bankpen biriktirdi.
«Silkway Accelerator-dyń birinshi legi óziniń tıimdiligin kórsetti. Úsh aıdyń ishinde barlyq qatysýshy kompanııalar aıtarlyqtaı ósti. Google jáne Astana Hub sarapshylarynyń qoldaýymen startaptar transformasııadan ótip, tamasha nátıjelerge qol jetkizdi. Qatysýshylar osyndaı qarqynda damysa eken deımiz. Jáne biz baǵdarlamany jalǵastyryp, jýyrda ekinshi leginiń jaqsy nátıjelerin kóremiz degen úmittemiz», dedi Astana Hub bas dırektory Maǵjan Mádıev.
Eske sala ketelik, Silkway Accelerator baǵdarlamasynyń birinshi legi bıyl shilde aıynda bastalyp, 28 qyrkúıekte Digital Bridge forýmynda baǵdarlamanyń qorytyndysy boıynsha Demo Day ótti. Oǵan Ortalyq Azııa, Ázerbaıjan jáne Mońǵolııa elderinen startaptar qatysty.
Silkway Accelerator baǵdarlamasynyń ekinshi legi 2 qyrkúıekte bastaldy. Astanada oflaın tártipte ótip jatqan oqý 3 aıǵa sozylady. Silkway Accelerator qatysýshylary tálimgerlikpen qatar, Astana Hub janynda tegin baspanaǵa, jumys ornyna ıe boldy, sondaı-aq Seed Money baǵdarlamasy boıynsha 55 myń dollarǵa deıin qarjy alý múmkindigi bar.
Google for Startups – 2011 jyly Google korporasııasy iske qosqan startap baǵdarlamasy. Ol 125 eldegi 50-den astam kovorkıng pen akseleratordan turady jáne bıznesti jańa bastaǵan kásipkerler úshin praktıkalyq sabaqtar usynady. Astana Hub bıyl Google for Startups baǵdarlamasynyń Ortalyq Azııadaǵy alǵashqy seriktesi boldy.
