MNP (Mobile Number Portability) qyzmeti Qazaqstanda 2016 jyly iske qosyldy. Sol ýaqyttan beri bul qyzmet ózektiligin joǵaltqan joq. 2016-2021 jyldar arasynda osy qyzmet boıynsha túsken ótinim sany 129-148 myń aralyǵynda qubylǵan. Ásirese, rekordty kórsetkish 2022 jyly tirkelgen. Jyl basynan beri 21 qazanǵa deıingi aralyqta qyzmettiń bul túri 160,2 myń ret qoldanylypty.
«Bul rette 85,4 myń abonent birden Beeline-ǵa aýysty. 2021 jyly da Beeline lıder atandy – portasııa úlesi 53 paıyzdy qurady. 2022 jyly shildeniń basynda Beeline abonenttik baza boıynsha da lıderlikti saqtap qaldy. Qazir bul baılanys operatorynyń 10,3 mln abonenti bar. О́tken jylmen salystyrǵanda abonent sany ósken (+6,6 paıyz). Bul operator naryqtyń 42 paıyzyn qalyptastyryp otyr. Al Kcell uıaly baılanys operatorynyń abonent sany – 8 mln nemese naryqtyń 32,6 paıyzy. О́z kezeginde Tele2/Altel operatorynyń abonent sany 6,2 mln-dy quraıdy», dep málimdedi Finprom.
Jalpy, 2022 jyldyń qazanyndaǵy derek boıynsha elde 25,3 mln uıaly baılanys abonenti bar. Byltyrmen salystyrar bolsaq, 4,5 paıyzǵa kóp. Aıta ketý kerek, qazan aıyndaǵy kúrt ósim aldyńǵy úsh jyldyq quldyraýdan keıin bolyp otyr. Máselen, byltyr osyndaı kezeńde abonent sany – 1,1 paıyzǵa, 2020 jyly – 5,3 paıyzǵa, 2019 jyly 2,6 paıyzǵa qysqarǵan edi.
Rasyn aıtsaq, uıaly baılanys sektory ınternettiń kelýi jáne onyń qoljetimdiliginiń artýy arqyly sıfrlyq qyzmetterdi damytýdyń draıverine aınala bastady. Al telefon nómirin aýystyrǵannan keıin de baıyrǵy operatordy saqtap qalý qyzmeti bul naryqty odan ári ashyq jáne básekege qabiletti ete túspek.
