Aqsýdaǵy kreatıvti jastar ortalyǵynyń jetekshisi Narıman О́skenbaev eskızdi tańdaý úshin «Young patriot» dep atalatyn arnaıy baıqaý uıymdastyrylǵanyn aıtady. Kelip túsken jumystardyń ishinde 17 jastaǵy Arýjan Abjatovanyń sýreti úzdik dep tanylǵan. «Jastardan mýral» dep atalatyn joba joǵaryda aıtqanymyzdaı Qarýly Kúshterdiń mereıtoıyna arnaldy.
– Baıqaý týraly aqparatty oqyǵanymda onyń ıdeıasy kóńilime birden uıalady. Eń áýeli halqymyzdyń jaýyngerlik rýhyn bir sýrette qalaı biriktirse bolady degenge bas qatyrdym. Oıyma jońǵar shapqynshylyǵyndaǵy qazaqtyń bas qolbasshysy Bógenbaı batyr orala berdi. Odan soń esimi tirisinde ańyzǵa aınalǵan ataqty panfılovshy, polkovnık Baýyrjan Momyshulynyń erlik isterin búgingi jas urpaq bilýge tıis dep sheshtim. Al mýraldaǵy úshinshi beıne – zamanaýı qazaq áskeriniń sarbazyn tabý qıyn bolmady, – deıdi jas keskindemeshi.
Arýjan bıyl oblys ortalyǵyndaǵy Baýyrjan Momyshuly atyndaǵy orta mektepti támamdapty. Bolashaq mamandyǵyn sáýlet salasymen baılanystyrmaq oıy bar. Qazirgi kúni Túrkııanyń Ankara qalasynda bilimin jalǵastyryp jatyr.
Bul keskindeme «My Style» aerografııalyq stýdııasy salǵan Aqsý qalasyndaǵy úshinshi mýral bolyp sanalady. Stýdııa basshysy Anton Tolchın toǵyz qabatty úıdiń syrtqy qabyrǵasyna mundaı keń aýqymdaǵy sýretti túsirý tájirıbede birinshi ret boldy deıdi. Qazaq batyrlaryn zamanaýı úlgide beıneleý úshin qyzmetkerler 60 kılogramm boıaý jumsapty. Avtokótergishtiń kómegimen mýral 18 saǵat ishinde salynyp shyqty.
Pavlodar oblysy,
Aqsý qalasy
