Vedomstvo habarlaǵandaı, bıylǵy baıqaýdyń barlyq kezeńi tolyǵymen sıfrlandyrylǵan. Sonyń arqasynda respýblıka boıynsha barlyǵy 5,5 myńnan astam ótinish kelip túsken. Bul - buryn bolmaǵan rekordtyq kórsetkish.
Qazir baıqaýdyń aqtyq synyna balabaqshalar men mektepterdiń 103 muǵalimi, kolledjderdiń 20 muǵalimi qatysyp jatyr. Olar aýdandyq, qalalyq jáne oblystyq kezeńderdiń qorytyndysy boıynsha usynylǵan.
«Bıyl alǵash ret ótinimderdi qabyldaý, tirkeý, konkýrs qujattaryn tapsyrý, baǵalaý jáne apellıasııa berý teachercontest.iac.kz portalynda júzege asyrylyp jatyr. Sondaı-aq ótinim berilgen sátten bastap barsha úmitker onlaın rejımde baıqaýdyń barlyq dınamıkasyn baqylaý múmkindigine ıe boldy. Iаǵnı qatysýshylar qaı kezeńde, olarǵa sarapshylar qandaı upaı berdi jáne t.b. baqylaı aldy. Bıyldyń taǵy bir jańalyǵy – áriptesterimiz konkýrs komıssııasy baǵalaıtyn ashyq sabaqtar ótkizedi. Júlde qoryn da kóbeıttik. Osyndaı sharalardyń arqasynda qatysýshylar sany ǵana emes, olardyń sapalyq quramy da artyp keledi», dedi Oqý-aǵartý mınıstrligine qarasty Orta bilim komıtetiniń tóraǵasy Gúlmıra Kárimova.
Aıta ketsek, «Úzdik pedagog» respýblıkalyq konkýrsy 2012 jyldan beri ótkizilip kele jatyr. Osy ýaqyt aralyǵynda mektepke deıingi jáne orta, tehnıkalyq jáne kásiptik bilim berý uıymdarynyń 600-ge jýyq muǵalimi «Úzdik pedagog» ataǵyna ıe boldy.
