Sport • 09 Qarasha, 2022

Eń qymbat qazaq fýtbolshysy

370 ret

kórsetildi

4 mın

oqý úshin

Jýyrda Germanııanyń Transfermarkt portaly birqatar qyzyqty málimet jarııalady. Fýtbolshylardyń naryqtaǵy qunyna taldaý júrgizip otyratyn ınternet basylymnyń deregi boıynsha, Anglııanyń «Manchester Sıtı» jáne Norvegııa ulttyq quramasynyń shabýylshysy Erlıng Holand álem fýtbolynyń eń qymbat oıynshysy atansa, Anglııa 2022 jylǵy 10 aıdyń qorytyndysynda eń qymbat quramalardyń kóshin bastady. Al Qazaqstan quramasy bul reıtıngte 85-orynǵa jaıǵasqan. ÝEFA boıynsha 38-satyda tur.

Álı BITО́RE

Bıyl jaz aıynda Dortmýndtyń «Borýssııasynan» Anglııanyń «Manchester Sıtıine» aýysyp kelgen 22 jastaǵy Erlıng Holand fransııalyq Kılıan Mbappeni birinshi orynnan yǵystyryp, eń qymbat fýtbolshylardyń reıtınginde top bastady. Dál qazirgi tańda Transfermarkt portaly norvegııalyq fýtbolshyny 170 mln eýroǵa baǵalap otyr. Al jeltoqsan aıynda 24 jasqa tolatyn PSJ jáne Fransııa ulttyq quramasynyń oıynshysy Kılıan Mbappe 160 mıllıon eýroǵa baǵalanǵan. Úzdik úshtikti Ispanııanyń «Real» jáne Brazılııa ulttyq quramasynyń 22 jastaǵy jartylaı qorǵaýshysy Vınısıýs (120 mln eýro) túıindep tur.

О́kinishke qaraı, álemniń eń qymbat 500 fýtbolshysynyń tiziminde birde-bir qazaqstandyq oıynshy joq. Degenmen germanııalyq basylymyń málimeti boıynsha, Qazaqstan quramasynyń eń qymbat fýtbolshysy dep Reseıdiń SSKA klýbynda dop tebetin jartylaı qorǵaýshy Baqtıer Zaınýtdınov (3,5 mln eýro) tanyldy. Odan keıingi oryndarǵa «Zenıttiń» qorǵaýshysy Nuráli Álip (1,5 mln), «Tobyl» men «Ahmattyń» (Reseı) qorǵaýshylary Sergeı Malyı men Marat Bystrov (900 myń), Ashat Taǵybergen (750 myń, «Tobyl»), Muhamedjan Seısen («Taraz»), Baǵdat Qaıyrov («Tobyl») jáne Artýr Shýshenachev («Qaırat», 700 myń) jaıǵasqan.

Ulttyq quramalarǵa toqtalar bolsaq, 1 mlrd 40 mln eýroǵa baǵalanǵan Anglııa álemdik reıtıngte birinshi orynda tur. Ekinshi orynǵa álem chempıonatynyń bes dúrkin jeńimpazy Brazılııa (1,14 mlrd) ornalassa, 2018 jyly Reseıde ótken dúnıejúzilik dop dodasynda bas júldeni oljalaǵan Fransııa (898 mln) úshinshi orynda keledi. Qurlyq boıynsha bólip qarasaq, Eýropada – Anglııa, KONMEBOL-da – Brazılııa, Azııa qurlyǵynda – Koreıa (152,02 mln), Afrıkada – Kot-d’Ivýar (366,75 mln), KONKAKAF-ta –AQSh (209 mln) quramalary kósh bastap tur.

Qazaqstan quramasy ÝEFA-da 17,6 mln eýromen jalpy esepte 38-orynnan kórindi. Al TMD quramalarynyń arasynda altynshy orynǵa jaıǵasqan. Kelmeske ketken KSRO memleketteriniń reıtınginde Ýkraına quramasy eń qymbat ujym atandy. Transfermarkt sarapshylary Andreı Shevchenkonyń izbasarlaryn 176,5 mln eýroǵa baǵalaǵan. Eń qymbat fýtbolshysy – Rýslan Malınovskıı («Atalanta», Italııa). Onyń naryqtaǵy baǵasy – 28 mln eýro. Ekinshi orynǵa Reseı quramasy jaıǵasty (138,8 mln eýro). Eń qymbat fýtbolshysy – «Krasnodar» qaqpashysy Matveı Safonov (16 mln eýro). Úshinshi oryndy Grýzııa quramasy (83,95 mln) túıindep tur. Qap taýy eliniń eń qymbat fýtbolshysy – Hvıcha Kvarashelııa («Napolı» Italııa) – 35 mln.

Keıingi oryndardy Armenııa (27,65 mln), О́zbekstan (24,65 mln), Ázerbaıjan (17,15 mln), Moldova (14,75 mln), Belarýs (12,60 mln), Estonııa (10,6 mln), Latvııa (9,6 mln), Lıtva (6,78 mln), Qyrǵyzstan (5,98 mln), Tájikstan (5,28 mln) jáne Túrikmenstan (2,06 mln) quramalary enshiledi.