Qaraqat Ábden oblystaǵy úlken aımaqtardyń biri bolyp sanalatyn Aral qalasynda jergilikti halyqpen júzdesip, saılaýaldy baǵdarlamasyn tanystyrdy. Budan bólek, kandıdat osy óńirde ulttyq jáne otbasylyq qundylyqtardy negizge alyp, kásibin dóńgeletip otyrǵan otbasylyq bıznes ókilderimen áńgimelesti.
Aral óńirinde qozǵalǵan mańyzdy taqyryptar Qyzylorda qalasyndaǵy kezdesýde jalǵasty. Jıyn barysynda qoǵamdaǵy ózekti máseleler, óskeleń urpaq pen jastar tárbıesi, otbasy ınstıtýtynyń máni talqylandy. Kandıdat qoǵam dertine aınalǵan sıntetıkalyq esirtki, qumar oıyndar men jat mádenıetke eliktegish jastardyń áreketterine erekshe toqtaldy. Onyń aıtýynsha, jat qylyqtardyń órshýine ulttyq qundylyqtardyń tıisti deńgeıde nasıhattalmaýy, otbasy tárbıesiniń álsireýi sebep.
Kezdesýde ulttyq kıim máselesi de sóz boldy. «Ulttyq kıim – estetıkalyq sán ǵana emes, halqymyzdyń tálim-tárbıesin, jastardyń boıyna patrıottyq sezim sińirýdiń eń tıimdi quraly. Dástúr de, óner de, halqymyzdyń fılosofııasy da ulttyq kıimimizde jatyr. Sondyqtan ulttyq kıim óndirýshilerge barynsha qoldaý kórsetýimiz kerek», dedi Qaraqat Ábden.
