Jańa josparda oblys ortalyǵy men G-4 City aýmaǵynda arnaıy ekonomıkalyq aımaqtar qurý da qarastyrylǵan. Sondaı-aq Prezıdent óńirge pedagogıkalyq kadrlar men dárigerlerdi tartý úshin, atap aıtqanda mamandardy jańa turǵyn úımen qamtamasyz etý sııaqty yntalandyrý sharalaryn qabyldaý qajettigin alǵa tartty.
«Qazirgi kúnde Qonaev qalasynyń bas josparyn «Ýrbostıl» kompanııasy ázirleýde. Bul taraptaǵy jumystar bıylǵy jyldyń 20 jeltoqsanyna deıin aıaqtalmaq. Sodan keıin zańnamaǵa sáıkes oblys ákimdigi jobalyq sheshimderdi qala turǵyndarymen ashyq talqylaýdy uıymdastyrady. Sonymen qatar búginde arnaıy ekonomıkalyq aımaqtardyń tujyrymdamasyn daıarlaý jumystary da júrgizilýde. Bul oraıdaǵy jumystar aıaqtalǵan soń QR IIDM bekitilgen zańnamalyq talaptarǵa sáıkes AEA qurý týraly jumystarǵa kirisedi», delingen mınıstrlik álimetinde.
Aıta keterligi, búginde Almaty oblysynda turǵyn úı máselesin ońtaıly sheshýdiń tetikteri iske qosylýda. Atap aıtqanda, jas mamandar «Alataý jastary» óńirlik baǵdarlamasy arqyly baspanaǵa qol jetkize alady.
