«Qoldaýlaryńyzǵa kóp rahmet! Meni kútip alýǵa kelgen barsha jankúıerge alǵys aıtamyn. О́z elime aman-esen jetkenime qýanyshtymyn. Sonymen qatar barsha qazaqstandyqqa alǵys aıtamyn. Aldaǵy ýaqytta Almaty qalasynda ótetin álem chempıonatyna qyzý daıyndalamyz», dedi Abzal Ájiǵalıev.
Sonymen qatar elge úlken jetistikpen oralǵan sportshylarymyzdy áýejaıdan Astana qalasy ákiminiń orynbasary Eset Baıken, qalalyq sport basqarma basshysynyń orynbasary Erkeǵalı Korbozov jáne sport salasynyń birqatar basshysy da gúl shoqtarymen kútip aldy.
Jańa maýsymdaǵy alǵashqy iri halyqaralyq jarys Qazaqstan komandasy úshin sátti ótti. Bul saıysta qazaqstandyq sportshylar álemdik deńgeıde joǵary oryndarǵa shyǵýǵa daıyn ekendikterin kórsetti.
Eske alsaq, short-trekten Qazaqstan erler quramasy Kanadanyń Monreal qalasynda ótken Álem Kýbogynyń alǵashqy kezeńinde estafetada ekinshi oryn alǵan bolatyn. Bul kvartette máre syzyǵyn Ońtústik Koreıa birinshi bolyp qıdy (7:01.850). Al bizdiń Ulttyq quramanyń nátıjesi: 7:07.972 mynadaı. Qola medal Kanadaǵa buıyrdy.
Al, osy qurama AQSh-tyń Solt-Leık-Sıtı qalasynda ótken Álem Kýbogynyń 2-kezeńinde Qazaq eline kúmis medaldi syılaǵan bolatyn. Osy tusta Abzal Ájiǵalıevtiń 500 metr qashyqtyqta óner kórsetýin erekshe ataýǵa bolady. Jerlesimiz jarysta tek kanadalyq Maksım Laýnnan qalyp ketti. Úzdik úshtikti ońtústik koreıalyq Lı Jýn So túıindegen bolatyn.
