Jıyn barysynda depýtat Sergeı Ershov óndiristik kásiporyndardaǵy ónerkásiptik qaýipsizdik máselesin kóterdi.
«Respýblıkalyq bıýdjet jobasynda óndiristik kásiporyndardyń ónerkásiptik qaýipsizdigin qamtamasyz etýge baǵyttalǵan júıeli sharalardy tappadyq. Memleket basshysy bul máselege erekshe nazar aýdarady. Al «ArselorMıttal Temirtaý» shahtasynda oryn alǵan sońǵy apattar qaýipti óndiristik obektilerde qaýipsizdikti qamtamasyz etý boıynsha shuǵyl qatań sharalar qabyldaýdy talap etti», dedi Sergeı Ershov.
Osyǵan baılanysty depýtat Úkimet ónerkásiptik qaýipsizdikke qoıylatyn talaptardy qatańdatý boıynsha zańnamalyq jáne uıymdastyrýshylyq tártipte qandaı sharalar qabyldaıtynyn surady.
«Bıyl biz TJM materıaldyq-tehnıkalyq jaraqtandyrýyn 78 mlrd teńge kóleminde qoldap otyrmyz, aldaǵy 3 jylǵa da tıisti qarajat bólindi. Qaýipti ónerkásiptik obektilerde ónerkásiptik qaýipsizdik jáne tehnologııalyq tártip talaptarynyń saqtalýyn qadaǵalaý júzege asyrylady», dep jaýap berdi Premer-Mınıstr Álıhan Smaıylov.
Premerdiń aıtýynsha, Úkimet zańnamany jetildirý sheńberinde jańa normalardy ázirlep jatyr.
«Jańa normalar óndiris ıeleri men basshylarynyń jaýapkershiligin arttyrýǵa, memleket tarapynan baqylaý sharalaryn kúsheıtýge, osyndaı qaýipti óndiristerdi materıaldyq-tehnıkalyq qaıta jaraqtandyrýdy qarjylandyrý kólemin osy kompanııalardyń jıyntyq tabysynyń keminde 1% kóleminde zańnamalyq bekitýge baǵyttalǵan. Sondaı-aq jańa tehnologııalardy eskere otyryp, ónerkásiptik qaýipsizdik talaptaryn qaıta qaraý, ózektendirý jáne ónerkásiptik qaýipsizdikke qatysty basqa da máseleler qamtylady», dep qosty Álıhan Smaıylov.
Budan basqa, ÁQBtK, Qylmystyq jáne kásipkerlik kodeksterge jáne «Azamattyq qorǵaý týraly» Zańǵa ózgerister engizý josparlanýda.
Premer-Mınıstr qoldanystaǵy zańnamada apattylyq pen jaraqattanýdy azaıtý úshin tehnıkalyq qaıta jaraqtandyrýdyń jıyntyq josparyn qalyptastyrý kózdelgenin atap ótti. Bıyl 2,5 myńnan astam tehnıkalyq qurylǵylardy aýystyrý jáne 100-den astam tehnologııalyq jelilerdi jańǵyrtý kózdelgen.
«Qaraǵandy oblysyndaǵy «ArsellorMıttal Temirtaý» shahtalarynda bolǵan apatqa keletin bolsaq, atalǵan kompanııa úshin kómir óndirý jónindegi jer qoınaýyn paıdalanýǵa arnalǵan kelisimshartty jaqynda qaıta qaraý barysynda biz jyl saıyn keminde 150 mlrd teńge kóleminde kómir óndirisin jańǵyrtýǵa ınvestısııalar bólý, sondaı-aq kómir qabattaryn gazsyzdandyrýǵa 37 mlrd teńge bólý qajettiligi bóliginde alǵash ret qosymsha talaptar qoıdyq. Buryn mundaı mindetter bolǵan joq. Biraq biz basqa jer qoınaýyn paıdalanýshylarǵa qatysty osyndaı qosymsha talaptar men mindettemelerdi kúsheıtýdi josparlap otyrmyz», dep qosty Álıhan Smaıylov.
