Sýretti túsirgen Esenjol Isabek
Doda osymen 14-inshi márte ótýde. 300-den astam oıynshy jeńisten dámeli bolyp kelip otyr. Bıyl týrnır jyldaǵydaı jas erekshelikteri boıynsha 5 topqa jiktelip, er jáne qyz balalar arasynda ótýde. Respýblıkanyń 10 oblysynan qatysýshylar kelip, jarystyń kórigin qyzdyrýda. Solardyń arasynda Batys Qazaqstan, Qostanaı, Jetisý, Abaı, Ulytaý, Shyǵys Qazaqstan, Aqtóbe, Aqmola, Qaraǵandy oblystarynan jáne ózimizdiń Pavlodar óńiriniń aýdan-qalalarynan sportshylar baq synaýda.
– Shynyn aıtaıyq, gazetimizdiń dástúrli týrnırine degen qyzyǵýshylyq joǵary deńgeıde. Bıylǵy jarysqa 8 sport sheberi, 30 sport sheberligine kandıdat, odan bólek, ártúrli sanattaǵy sportshylar qatysyp, aqyl-oı jyldamdyǵymen jarysýda. Jyl saıyn kemi 300-400 sportshy týrnırge qatysady. Básekeni ótkizýdegi negizgi maqsatymyz – toǵyzqumalaqtyń buqara arasynda keńinen tanylyp, onymen shuǵyldanýshylar sanyn eseleý. 2008 jyldan beri úzbeı jalǵasqan týrnır óziniń kózdegen mejesin baǵyndyryp kele jatyr, – deıdi «Saryarqa samaly» gazetiniń bas redaktory Nurbol Jaıyqbaev.
Jarys rapıd túri boıynsha, 9, 11, 13, 15, 16 jas jáne odan joǵary jastaǵy sportshylar arasynda jalǵasýda. Bıylǵy dodaǵa Batys Qazaqstan oblysynan sol óńirdegi toǵyzqumalaq federasııasynyń prezıdenti Danııar Orynbasarov 6 shákirtin ertip kelipti. Bapker Kerekýge birinshi ret kelip otyrǵandaryn jetkizdi. Al Aqsý qalasynyń komanda jetekshisi Gúljan Saparova 18 balany úkilep qosqanyn baıandady. «Jyl saıyn ótetin bul týrnırdiń birde-bir oıynyn qaldyrǵan emespiz. Osy týrnırge 18 bala daıyndap alyp keldim. Olardyń ishinde 3 sportshy – respýblıkalyq, halyqaralyq deńgeıde ótken týrnırlerdiń jeńimpazy. Tálimgerlerime úlken úmit artyp otyrmyn», deıdi ol.
Pavlodar oblystyq toǵyzqumalaq federasııasynyń vıse-prezıdenti Arystan Qapaev búginde óńirde 2 myń adam ulttyq sportpen turaqty aınalysatynyn aıtady. Aımaǵymyzda 2 halyqaralyq dárejedegi sport sheberi, 20-dan astam sport sheberi jáne kóptegen sport sheberligine kandıdattar bar. Jýyqta Rınat Kereıbaev el chempıonatyn utyp, endi alda ótetin álem birinshiligine daıyndalýda. Al Janat Qaımoldın men Jámıla Baıaldasheva - halyqaralyq týrnırlerdiń júldegeri. Aıajan Egimbaı esimdi boıjetken jastar arasyndaǵy birinshilikterde aldyńǵy oryndardan kórinýde. Aımaq toǵyzqumalaqshylary respýblıkalyq reıtıngte úzdik úshtikten túsip kórmegen.
Jarystyń bas tóreshisi Shárip Qashkenovtiń aıtýynsha, «Shahmat úıiniń» syıymdylyǵy mundaı shamadaǵy oıynshylardy birden qabyldaýǵa qaýqarsyz. Jyl saıyn dál osy týrnırge qatysýshylar kóp jınalatyndyǵy sebepti, oryn jetkize almaı qysylyp qalamyz, deıdi. Sondyqtan toǵyzqumalaqshylarǵa arnalǵan sport saraıy aldaǵy ýaqytta keńeıtilse nemese jańadan salynyp berilse degen tilegin jetkizdi.
PAVLODAR
