Ammanda top bastaı almadyq

О́zderińiz kórgendeı, jigitterimiz fınalda toǵyz salmaqta baq synaǵanymen, nebári úsh boksshymyzǵa ǵana tuǵyrdyń bıik satysynan kóriný baqyty buıyrdy. Al fınalǵa nebári jeti bylǵary qolǵap sheberi shyǵyp, sonyń beseýi altyn tuǵyrdan kóringen О́zbekstan quramasy sapaly júlde jaǵynan jalpy esepte top jardy.

Bıylǵy Sary qurlyq dodasynan bas­tap boksshylar ádettegideı 10 emes, 13 salmaqta judyryqtasty. Barlyq salmaqta boksshy aparǵan Qazaqstan quramasy «á» degennen chempıonatty sátti bastaǵanymen, fınalda bar ónerin ortaǵa sala almady. Ammanǵa attanǵan 13 ókilimizdiń tek bireýi ǵana (Sanatáli Tóltaev, 63,5 kılo) irikteýden óte almaı, qalyń toptyń arasynda qalyp qoısa, jartylaı fınalǵa shyqqan 12 boksshymyzdyń úsheýi qola júldeni qanaǵat tutty. 60 kılo salmaqtaǵy Sanatáliniń syńary Samatáli Tóltaev fınalǵa joldama berer básekede jergilikti boksshy Abý Djadje Mýhammedke ese jiberse, 2018 jylǵy jastar arasyndaǵy álem chempıony, el birinshiliginiń jeńimpazy Nurbek Oralbaı da (80 kılo) ıordanııalyq boksshy Hýseın Eıshaıshıashaıshtyń osal tusyn taba almady. Bir qyzyǵy, sharshy alań ıesiniń eki ókili de óz elinde ótken qurlyq dodasynda altynnan alqa taqty. Sondaı-aq 86 kıloda baq synaǵan Saǵyndyq Toǵambaı taǵy bir ıordanııalyq Rııad Adelhındavı Odaıdan utyldy. Osylaısha, úsh sportshymyz qola medaldy moıyndaryna ildi.

Jankúıerler taǵatsyzdana kútken fınal jekpe-jeginde elimizdiń toǵyz boksshysy judyryqtasty. 13 salmaqtyń beseýinde Azııa jurty qazaq-ózbek teketiresin tamashalady. Sharshy alańǵa birinshi bolyp qazaqstandyqtardan  48 kılo salmaqtaǵy el chempıony Sanjar Táshkenbaı kóterilip, japonııalyq Kazýma Aratakeni bet qaratpaı jeńdi. Jeńil salmaqtaǵy jerlesimizge Azııa chempıonatynyń jerebesi aýyr tússe de, ol barlyq qarsylasynan bir bas joǵary turyp, tóreshilerdiń bura tartýyna esh múmkindik bergen joq. Birinshi aınalymda ózbekstandyq Asylbek Jalılovty 5:0 esebimen tize búktirse, ekinshi aınalymda qyrǵyzstandyq boksshyny dál sondaı nátıjemen jeńdi. Jartylaı fınalda úndistandyq Kýmar Sahanı Govındti jarys jolynan yǵystyrdy.

Byltyr bul salmaqta taǵy bir jas talantty boksshymyz Danıal Sábıt qatysyp, kúmispen kúptelgen edi. Eki boksshynyń jas ekenin eskersek, bapkerler aldaǵy bes-alty jylda bul salmaqqa asa qatty bas qatyra qoımas. Eń ókinishtisi, 48 kılo salmaq Olımpıada baǵdarlamasynda joq. Áıtpese, Táshkenbaıdyń myna qarqynymen Parıjde de top jarýǵa múmkindigi bolatyn edi. 

О́kinishke qaraı, odan keıin rıngke shyqqan úsh qandasymyz da Sanjardyń jeńisti jolyn jalǵaı almady. Tokıo Olımpıadasynyń qola júldegeri, byltyrǵy álem chempıony Sáken Bıbosynov fınalda syralǵy qarsylasy ózbekstandyq Hasanboı Dýsmatovtan tóreshiler sheshimimen jeńilip qaldy. Serbııadaǵy álemdik dodanyń alǵashqy aınalymynda osy eki boksshy kezdesip, sol kezde jerlesimizdiń mereıi ústem bolǵan edi. Bul joly Dýsmatov basym boldy. Ázirshe eki boksshy arasyndaǵy esep – 1:1.

57 kıloda óner kórsetken Serik Temir­janov ta fınalda ózbekstandyq boks­shyǵa ese jiberdi. Jastar arasyndaǵy Olımpıada jáne álem chempıony, eresekter arasyndaǵy jahandyq dodanyń jáne Azııa­nyń kúmis júldegeri Abdýmalık Halo­kov­pen judyryqtasqan Serik qarsy­l­asynan taza jeńildi. О́zbek boksshysy jyl­damdyq jaǵynan da, kóp soqqy darytýdan da jerlesimizden bir bas joǵary boldy.

Serbııadaǵy álem chempıonatynyń fınalynda súringen Mahmud Sabyrhan (54 kılo) bıylǵy Azııa birinshiliginde de sol mejeden kórindi. Altyn úshin ótken aıqasta Tokıo Olımpıadasynyń kúmis júldegeri fılıppındik Karlo Paalamnan utyldy. Al 67 kıloda qurlyq birinshiligine alǵash ret qatysqan Dýlat Bekbaýov Taıland boksshysy Býndjongý Sınsırıge tóreshilerdiń aralas sheshimimen (3:2) jol berdi.

Ulttyq quramanyń kapıtany 71 kılodaǵy Aslanbek Shymbergenovtiń óneri kópshiliktiń kóńilinen shyqty. Quramadaǵy eń tájirıbeli boksshynyń biri sanalatyn jambyldyq óren fınalǵa deıin erkin jetti. Eki qarsylasyn esinen tandyrǵan ol sheshýshi básekede jergilikti boksshy Zıed Ishashndy tóreshilerdiń aralas sheshimimen jeńdi – 3:2.

О́kinishke qaraı, 75 kılodaǵy Nurqanat Raıys fınalda taǵy bir ózbekstandyq Saıdjamshıd Djafarovqa ese jiberdi. О́zbek boksshysy byltyrǵy Azııa birinshiliginiń fınalynda otandasymyz Ábilhan Amanquldy jeńip, Sary qurlyq chempıony atansa, bıyl da jerlesimizdi tize búktirip, altynnan alqa taqty.

92 kılo salmaqtaǵy Aıbek Oralbaıdyń fınaldaǵy jekpe-jegi kópshiliktiń kólinen shyqpasa da, fınalda О́zbekstan quramasyndaǵy taǵy bir etnostyq qazaq – Madııar Saıdrahımovtan basym túsip, el quramasyna úshinshi altyndy saldy. Alǵashqy eki raýndta belsendi qımyldaǵan jerlesimiz úshinshi raýndta tek qorǵanýmen boldy. Abyroı bolǵanda, Madııar Aıbekti joıqyn soqqysymen nokaýtqa túsire almady. Bul eki boksshy alǵash ret Serbııadaǵy álem chempıonatynyń ekinshi aınalymynda kezdesip, M.Saıdrahımov 4:1 esebimen jeńiske jetken edi. Endi, mine, araǵa bir jyl salyp Aıbek byltyr ketken esesin qaıtaryp, ózbekstandyq boksshyny altynsyz qaldyrdy.

Asa aýyr salmaqta judyryqtasqan Qamshybek Qońqabaevqa qazaqstandyq boks jankúıerleri de, osy salanyń mamandary da jerebe qorytyndysy boıynsha Azııa birinshiliginiń altyn júldesin aldyn ala berip qoıǵan edi. Sebebi, Qońqabaevtyń bas­ty qarsylasy – ózbekstandyq Bahodır Jalolov bıyl dodaǵa qatysqan joq. Degen­men mamandardyń boljamy árdaıym shyndyqqa sáıkes kele bermeıdi eken. Keıingi 2-3 jyldyń kóleminde birese ká­sipqoı, birese áýesqoı boksta óner kór­setip júrgen Qamshybek kútpegen jerde óz­bekstandyq jas boksshy Lazızbek Mýlla­jo­novtan jeńilip qaldy. Azııa chempı­onatyna tyńǵylyqty daıyndalyp kel­gen ózbek boksshysy taktıkalyq ta, tehnı­kalyq ta turǵydan basym bolyp, Sary qur­lyqtyń bas júldesin esh kúmánsiz jeńip aldy.

Erler arasyndaǵy jalpykomandalyq esepte 5 altyn, 2 kúmis, 3 qola jeńip alǵan О́zbekstan quramasy top jarsa, Qazaqstan 2-orynǵa ıe boldy. Úzdik úshtikti jarys qojaıyny Iordanııa (2 altyn, 2 kúmis, 1 qola) túıindedi. Odan keıingi oryndarǵa Taıland (2 altyn), Fılıppın (1 altyn), Úndistan men Mońǵolııa (1 kúmis, 4 qola), Japonııa (1 kúmis, 1 qola), Qyrǵyzstan (4 qola), Iran men Tájikstan (2 qoladan) jáne Pákistan pen Taıvan (1 qola) quramalary jaıǵasty.

Al áıelder básekesine toqtalar bolsaq, Shámil Safıýllın jattyqtyratyn Qazaqstan ulttyq quramasy 3 altyn, 1 kúmis, 5 qola medal jeńip aldy. Atap aıtar bolsaq, Iordanııada Alýa Balqybekova (48 kılo), Jaına Shekerbekova (54 kılo) jáne Karına Ibragımova (57 kılo) Ánuranymyzdy shyrqatsa, Gúlsaıa Erjan (81 kılo) kúmis medal ıegeri atandy. Sondaı-aq Nazym Qyzaıbaı (50 kılo), Jazıra Oraqbaeva (52 kılo), Mádına Nurshaeva (66 kılo), Darıǵa Shákimova (70 kılo) jáne Lázzat Kúngeıbaeva (+81kg) óz salmaqtarynda úshtikti túıindedi.

Áıelder arasynda Úndistan quramasy (4 altyn, 1 kúmis, 1 qola) kósh bastasa, 2-oryn Qazaqstannyń (3 altyn, 1 kúmis, 5 qola) enshisinde qaldy. Odan keıingi oryndarǵa Japonııa (1 altyn, 3 kúmis), Ońtústik Koreıa (1 altyn, 1 kúmis, 4 qola), О́zbekstan (1 altyn, 1 kúmis, 1 qola), Taıvan (1 altyn, 3 qola), Vetnam (1 altyn, 1 qola) jaıǵasty.

P.S. Ammandaǵy Azııa chempıonatynda Qazaqstan erler quramasynyń óneri jankúıerlerdiń kóńilinen shyqty dep aıta almaımyz. Qytaı quramasy qatyspaǵan, О́zbekstan, Mońǵolııa, Japonııa sııaqty elderdiń negizgi boksshylary kelmegen jarysta jeńip alǵan úsh altynnyń quny shamaly ekeni belgili. Sondaı-aq fınaldaǵy bes qazaq-ózbek tartysynyń bireýinde ǵana jerlesterimizdiń jeńiske jetýi (onyń ózinde aıqyn basymdyq tanytqan joq) qazaq boksynyń deńgeıi asa joǵary emes ekeninen habar berip turǵandaı. Bokstan kelesi jylǵy álem chempıonaty О́zbekstannyń bas shahary – Tashkentte ótedi. Masqaranyń kókesi sol kezde bolmasyn dep tileıik. Qazaqstan boks federasııasynyń basshylyǵy men jattyqtyrýshylar quramy bul dodadan tıisti nátıje shyǵaryp, aldaǵy álem jáne Azııa oıyndaryna jaqsy daıyndyqpen barady degen úmittemiz.

Ammandaǵy Azııa chempıonatynda erler arasynda myna boksshylar jeńis tuǵyrynan kórindi: 48 kılo – Sanjar Táshkenbaı (Qazaqstan), 51 kılo – Hasonboı Dýsmatov (О́zbekstan), 54 kılo – Karlo Paalam (Fılıppın), 57 kılo – Abdýmalık Halokov (О́zbekstan), 60 kılo – Abý Djadje Mýhammed (Iordanııa), 63,5 kılo – Rýslan Abdýllaev (О́zbekstan), 67 kılo – Býnjong Sınsırı (Taıland), 71 kılo – Aslanbek Shymbergenov (Qazaqstan), 75 kılo – Saıdjamshıd Jafarov (О́zbekstan), 80 kılo – Hýseın Eıshaıshıashaısh (Iordanııa), 86 kılo – Jakapong Emhot (Taıland), 92 kılo – Aıbek Oralbaı (Qazaqstan) jáne +92 kılo – Lazızbek Mýllajonov (О́zbekstan).

Qyzdar básekesiniń jeńimpazdary mynalar: 48 kılo – Alýa Balqybekova (Qazaqstan), 50 kılo – Thı Tam Ngýen (Vetnam), 52 kılo – Kınosıta Rınka (Japonııa), 54 kılo – Jaına Shekerbekova (Qazaqstan), 57 kılo – Karına Ibragımova (Qazaqstan), 60 kılo – Endjı O (Koreıa), 63 kılo – Parvın (Úndistan), 66 kılo – Novbahar Halıdova (О́zbekstan), 70 kılo – Chen Nen Chınt (Taıvan), 75 kılo – Lovlına Borgohaın (Úndistan), 81 kılo – Savıtı (Úndistan) jáne + 81 kılo – Alfııa Taranným Akram (Úndistan).