Bul jobanyń bastamashysy – Fransýz tili muǵalimderiniń halyqaralyq federasııasy Pedagogıkalyq ınnovasııalar qory men Frankofonııa uıymy. Qazaqstan fransýz tili muǵalimderi qaýymdastyǵynyń prezıdenti Aıgúl Doshanova atap ótkendeı, ekologııalyq belsendilikti arttyrý maqsatynda qazir elimizdiń mektepterimen, joǵary oqý oryndarymen tyǵyz baılanys ornatylǵan. Aksııa aıasynda osy kezge deıin qorshaǵan ortany, tabıǵatty qorǵaýǵa baılanysty konkýrstar, sporttyq oıyndar ótti, logotıpter ázirlendi. Respýblıkalyq deńgeıde uıymdastyrylǵan aksııanyń qorytyndysy qarasha aıynda Astanada jarııalanady.
«Qaýymdastyq búginde fransýz tili muǵalimderine oqý-ádistemelik qoldaý kórsetý maqsatynda kóptegen ıgi jobany iske asyryp keledi. Bıyl Fransýz tiliniń halyqaralyq federasııasy bastamashy bolǵan klımattyq ózgerister men turaqty damýǵa baılanysty ótken konkýrsta Qazaqstan fransýz tili muǵalimderi qaýymdastyǵy jeńimpaz atandy. 100-den astam memleket qatysqan halyqaralyq jobada jeńip alǵan qarjylaı syılyqqa fransýz tiliniń muǵalimderine arnaıy platformalar satyp alyndy. Endigi kezekte bul platformalar qazaqstandyq oqytýshylar úshin aýqymdy baǵdarlamalarymen erekshelenetin bolady», dep atap ótti A.Doshanova.
«Fransýz tilin úırenemiz jáne ekobelsendi bolamyz» aksııasynyń Memleket basshysy Qasym-Jomart Toqaev bilim alǵan Ilııas Esenberlın atyndaǵy №25 mektep-gımnazııasynda ótýiniń de ózindik sebebi bar. Mektepte fransýz tili 1-synyptan bastap oqytylady. Aksııa barysynda oqýshylar ózderi daıyndaǵan arnaıy jobalardy, prezentasııalar men fotokollajdardy fransýz tilinde tanystyryp, tabıǵatty aıalaý, jan-janýarlardy qorǵaý, tazalyqty saqtaý arqyly adamzat ıgiligine qyzmet etýge baılanysty jarqyn oılaryn ortaǵa saldy. Fransýz tilinde án aıtyp, óz ónerlerin kórsetti.
Almaty qalasy bilim basqarmasynyń qoldaýymen ótken is-shara barysynda Fransııanyń Almaty qalasyndaǵy Bas konsýly Fabrıs Neve oqýshylardyń ekologııalyq jobalar jasaýdaǵy belsendiligine rızashylyǵyn bildirdi. Bas konsýldyń aıtýynsha, búginde eki el arasyndaǵy bilim berý yntymaqtastyǵy jalǵasyn taýyp, bilim almasý jobalary aıasynda júzege asyp keledi. Osyǵan oraı onnan asa fransýzdyq oqýshy №25 mektepke kelip, Qazaqstannyń tynys-tirshiligimen, salt-dástúrimen tanyssa, endigi kezekte almatylyq oqýshylardyń Fransııaǵa saıahaty josparlanyp otyr. Sondaı-aq «Daýn» sındromy, estý jáne tirek-qımyl apparaty buzylǵan balalarǵa qoldaý kórsetý maqsatynda Fransııadan Qazaqstanǵa velosıpedpen kelgen saıahatshy jup Emılı men Devıdtiń saparyn eske salǵan Bas konsýl bul baǵytta mektep oqýshylary, joǵary oqý oryndarynyń stýdentterimen kezdesýler uıymdastyrylǵanyn atap ótti. Búginde Fransııanyń ekologııalyq saıasattaǵy jobalary nazar aýdarýdy qajet etedi. Parıjdiń klımattyq kelisimderi ekologııalyq qaýipsizdik salasyndaǵy kóptegen jobada tıimdiligin kórsetip otyr. Osy oraıda Bas konsýl mektep oqýshylarynyń, jastardyń ǵalamdyq klımattyq ózgerister kezeńinde óz aýmaǵynda júzege asyryp otyrǵan jobalaryna qoldaý kórsetýiniń mańyzyn atap ótti.
«Eco network» jobasynyń negizin qalaǵan Evgenıı Muhamedjanovtyń aıtýynsha, qorshaǵan ortany qorǵaý búginde ǵalamdyq problemaǵa aınalyp otyr. Sondyqtan ekologııalyq belsendilik árbir azamattyń boıynan tabylýy qajet. Bul baǵytqa mektep oqýshylaryn jumyldyrý aldaǵy onjyldyqtarda jemisin beretin nátıjeli is. Qaıyrymdylyq maqsatta júzege asatyn jobaǵa búginde №25 mekteppen qatar RFMM, «Prestıj» jáne 2 jekemenshik, 8 memlekettik mektepti qamtý kózdelip otyr. Astana qalasy, Qostanaı, Ulytaý jáne Aqtóbe oblystarynda da jobalar júzege asýda. Joǵary oqý oryndarymen de baılanys ornatý josparda bar. Qazirgi kezde №25 mektepte ekobokstar qoıylyp, oqýshylarmen birlesken is-sharalar júzege asyrylyp keledi.
Aksııa sońynda ekobelsendiler pikir almasyp, jańa jobalarǵa qatysty josparlarymen bólisti.
ALMATY
