«Samarqandta ótken Túrki memleketteri uıymynyń búgingi sammıtinde barlyq memlekettiń terrıtorııalyq tutastyǵyn qoldaý jáne BUU Jarǵysyn saqtaý týraly Prezıdenttiń búgingi málimdemesine qatysty BAQ-tan suraqtar kelip túsip jatyr. Osyǵan baılanysty Memleket basshysy bul málimdemeni Soltústik Kıpr Túrik Respýblıkasyna Túrki memleketteri uıymynda baqylaýshy mártebesin berý týraly ótinishine oraı jasaǵanyn atap ótkim keledi.
Qazaqstan BUU Jarǵysyn jáne halyqaralyq quqyqtyń negizgi qaǵıdattaryn dáıekti túrde ustanady. Prezıdent bul jóninde birneshe ret aıtqan», dep jazdy R.Jeldibaı Facebook áleýmettik jelidegi paraqshasynda.
Aıta ketsek, Prezıdent Qasym-Jomart Toqaev Samarqandta ótken jıynda Qazaqstan barlyq memlekettiń terrıtorııalyq tutastyǵyn sózsiz qoldaıtynyn aıtqan bolatyn.
«Túrki memleketteri uıymynyń qyzmetin buqaralyq aqparat quraldary arqyly belsendi túrde dáripteýimiz kerek. Bul – óte qajet nárse. Osy jumysty elderimizdiń ishindegi aqparat quraldary jáne belgili halyqaralyq agenttikter aıasynda júrgizýge bolady. Sebebi álem qaýymdastyǵy bizdiń túrki álemindegi yqpaldastyqty nyǵaıtý úshin jasap jatqan aýqymdy jumysymyz týraly bilýi qajet. Shyndyǵyn aıtsaq, jahan jurtshylyǵy bizdiń uıymnyń jumysy týraly áli de jaqsy bile bermeıdi. Degenmen, qazir Túrki yntymaqtastyǵy ıdeıasy búkil álemniń nazaryn ózine aýdara bastady. Túrki órkenıeti týraly habar beretin qundy derekter Jer sharynyń túrli aımaqtary men qurlyqtarynan tabylyp jatyr. Bul – bizdiń elderimizge ortaq qundylyqtar. Sondyqtan, qolda bar tarıhı jáne tildik derekterdi júıelep, retke keltirý mańyzdy mindet dep oılaımyn. Ǵylymı ınstıtýttardyń jáne mekemelerdiń aıasynda belsendi jumys uıymdastyryp, ony álem jurtshylyǵyna keńinen tanystyrýymyz kerek. Uıymnyń jumysy dıplomatııalyq sammıtter men qorytyndy qujattary bar kezdesýlermen ǵana shektelip qalmaǵany jón. Túrki memleketteri uıymy barsha túrki álemindegi halyqtardy jaqyndastyratyn yqpaldy ortalyqqa aınalýy qajet dep sanaımyn. Qazaqstan barlyq memlekettiń terrıtorııalyq tutastyǵyn sózsiz qoldaıdy, sondaı-aq BUU Jarǵysyn múltiksiz saqtaý qajet dep esepteıdi. Bul – bizdiń elimizdiń negizgi múddesine tolyq saı keletin mańyzdy qaǵıdat. Sondyqtan biz osy qaǵıdatqa árdaıym basymdyq beretin bolamyz», dep túıindedi sózin Qasym-Jomart Toqaev.
