Bazarda myń kisi bar, árkim tanyǵanyna sálem beredi. Álemdik naryqty bazar dep alyp qarasaq, jańa qurylǵan táýelsiz el retinde onda óz ornymyzdy saılaý úshin de ulttyq aqshamyzdyń bolýy zańdylyq ári qajettilik edi. Osydan otyz jylǵa jýyq ýaqyt buryn eriksiz rýbl aımaǵynda qalǵan elimiz óziniń tól valıýtasyn qysqa merzimde jasap, basyp shyǵarǵany belgili.
Altyn bazarynda baǵaly. Tól valıýtamyz – teńgeniń de elimizde, álemdik qoǵamdastyqta osy otyz jylǵa jýyq ýaqytta ózindik baǵamy qalyptasty. Álbette, pulsyz berip, qunsyz alatyn dúnıe joq naryqta narqyn joǵaltpaýdyń ózi óte úlken jetistik. «Kilem satsań, aýyldasyńa sat, bir shetinde óziń otyrasyń» deıtin ýaqyt emes, jıileı túsken jahandyq resessııa otandyq ekonomıkaǵa da óz salqynyn tıgizbeı turmaıdy. Jasyratyny joq, «jarlynyń aqshasyn jaman taýar qurtady» degendeı, daıyn ónim turǵysynan ımportqa ıek artqan elimizde tól valıýtamyzdyń synaqqa túsken kezi kóp boldy. Jalpy, buıyǵy jatar naryq bolmaıdy, sondyqtan teńge úshin kúres áli alda.
Sońǵy jyldary kúlli dúnıeni keri ketirgen pandemııa men bıylǵy geosaıası ahýal da halyqaralyq naryqtyń qalyptasqan jelilerin byrt-byrt úzip, álem ári-sári kúı keship tur. Munyń bári qarjy quraldaryna, ulttyq valıýtalarǵa oń áser ete qoımaǵany da anyq. Mine, osyndaı syndarly kezeńde ulttyq ekonomıkamyzdyń tiregi bolar teńgeniń ózge elderdiń valıýtalarymen teń, tipti bási basym bolýyn tileımiz. Bir teńge bıe bolatyn, eki teńge túıe bolatyn kezeńge jetý úshin el ekonomıkasyna ár otandasymyzdyń úzdiksiz úles qosýy mańyzdy bolyp qala bermek.
