Qazir elimizde 20 qarashaǵa belgilengen kezekten tys prezıdent saılaýy sheńberinde úgit-nasıhat kezeńi jalǵasyp jatyr. Osyǵan oraı quzyrly organ osy kezde saılaýǵa baılanysty qoǵamdyq pikirge saýal salýdy júrgizý tártibi zańmen qatań retteletinin eskertip ótti.
Naqty aıtqanda, bul salada keminde 5 jyl tájirıbesi bar, saýal salý týraly Ortalyq saılaý komıssııasyn aldyn ala jazbasha habardar etken, tirkelgen zańdy tulǵalar ǵana qoǵamdyq pikirge saýal salýdy júrgizýge quqyly. Al habarlamada saýalnama júrgizýge qatysatyn jáne onda jumys tájirıbesi bar mamandar, saýal salý júrgiziletin óńirler, qoldanylatyn taldaý ádisteri týraly málimetter jan-jaqty kórsetilýge tıis.
Búgingi kúnge deıin OSK-ǵa osyndaı jazbasha habarlamamen 7 zańdy tulǵa júgingen. Alaıda Bas prokýratýra saılaý kúni daýys berýge arnalǵan úı-jaıda qoǵamdyq pikirge saýal salýǵa tyıym salynǵanyn málimdedi. Saılaý kúni saılaý ýchaskelerinen shyǵý kezinde OSK-ny jazbasha habardar etken, belgilengen tártippen tirkelgen zańdy tulǵalarǵa ǵana saýal salýdy júrgizýge ruqsat etiledi.
«BAQ saýal salý nátıjelerin jarııalaý kezinde ony júrgizgen zańdy tulǵany jáne saýal salýǵa tapsyrys bergen jáne tólegen adamdardy, ótkizý ýaqytyn, aqparat jınaý ádisin, suraqtardyń naqty tujyrymyn, suralǵandardyń sanyn jáne saýal salý nátıjeleriniń qatelik koeffısıentin kórsetýge mindetti.
Saýal salý nátıjelerin, saılaý nátıjeleriniń boljamdaryn, saılaýǵa baılanysty ózge de zertteýlerdi daýys berý kúnine deıin 5 kún ishinde jáne daýys berý kúni BAQ-ta jarııalaýǵa jol berilmeıdi», dep jazylǵan vedomstvo taratqan habarlamada.
Iаǵnı BAQ saýal salý nátıjelerin 15 qarashaǵa deıin jarııalaı alady. Al saılaý kúni saılaý ýchaskelerinen shyqqanda júzege asyrylǵan qoǵamdyq pikirge saýal salý nátıjelerin 20 qarashadan keıin ǵana BAQ-ta jarııalaýǵa ruqsat etiledi.
«Konstıtýsııalyq zańnyń bul talaptaryn saqtamaý Ákimshilik quqyq buzýshylyq týraly kodekstiń 120-baby boıynsha jaýaptylyqqa ákep soǵady. Osyǵan oraı barlyq jeke jáne zańdy tulǵalardy, buqaralyq aqparat quraldaryn saılaý prosesiniń buzylýyna jol bermeýge, onyń ishinde saılaýǵa baılanysty qoǵamdyq pikirge saýal salýdy júrgizý jáne jarııalaý kezinde Konstıtýsııalyq zańdy múltiksiz saqtaýǵa shaqyrady», dep habarlady Bas prokýratýra.
