Sýretti túsirgen Nurbolat NURJAÝBAI
Bul kitapshalar osy salada shırek ǵasyrdan asa qyzmet kórsetip kele jatqan «ASU» baspa úıi» JShS men «Balapan» telearnasynyń arasynda jasalǵan kelisim shart negizinde jaryq kórip otyr.
«Qyzylorda qalamgerler qaýymdastyǵy» uıymdastyrǵan tusaýkeserde oblys ákiminiń orynbasary Nurymbet Saqtaǵanov otandyq anımasııalyq fılmderdiń boıaý kitapshalaryn shyǵarý baspa tarapynan balalar jyly aıasynda búldirshinderge jasalǵan úlken syı bolǵanyn atap ótti. Oblystyq máslıhat depýtaty, «Syr medıa» JShS bas dırektory Amanjol Ońǵarbaev balalardyń oı kókjıegin keńeıtip, qııalyn ushtaıtyn sýretti kitapshalardyń óskeleń urpaq tárbıesindegi ornynyń erekshe etkendigin jetkizdi.
«ASU» baspa úıi» JShS dırektory Qasymhan Qadyrbaevtyń aıtýynsha «Balapan» telearnasy 10 shaqty mýltıserıal usynǵan eken. Onyń ishinde qazaq tiline aýdarylǵan dúnıeler de bolypty. Qazaq anımasııasyna qoldaý bildirýdi kózdegen baspa «Balapan» stýdııasynyń tapsyrysymen túsirilgen osy ekeýin tańdap alǵan.
Áýelgide 3D formatynda «Dala oıyndary» degen ataýmen efırge shyqqan mýltıserıal keıingi maýsymda «Sıqyrly tas» bolyp ózgerdi. Biraq keıipkerleri, jelisi saqtalyp qalǵan týyndydaǵy beıneler balalarǵa ábden tanys. Al onyń boıaý kitapshasy alty jasqa deıingi balalarǵa arnalyp shyǵaryldy.
Odan úlken balalar úshin 2D formatynda túsirilgen tarıhı tanymdyq «Ál-Farabı» mýltıserıaly tańdaldy. Munda álemdegi ekinshi oıshyl sanalǵan ǵulamanyń qanatty sózderiniń ishinen oqý-bilimge, ǵylymdy súıýge shaqyrǵan oılary yqshamdap engizilip otyr. Kitapshalardyń ár betindegi QR kod arqyly kez kelgen mýltıserıaldy kórýge bolady.
Qazaqstan Sýretshiler odaǵynyń múshesi, M.Mámetova atyndaǵy joǵary pedagogıkalyq kolledj oqytýshysy Aınur Qaramurzaeva balalarǵa bazarlyq jasaǵan baspa ujymyna alǵysyn jetkizdi.
Jobanyń kórkemdik jetekshisi jergilikti sýretshi, dızaıner Qýanysh Orazbaev sýretterdi grafıkalyq planshet arqyly salypty. Al tehnıkalyq redaktory kásibı maman Baqytjan Salmyrza.
QYZYLORDA
