Sammıtte álem kóshbasshylary COVID-19 pandemııasynan týyndaǵan syn-qaterlerdi, ózekti jahandyq máselelerdi jáne ınklıýzıvti ósý úshin ekonomıkadaǵy kúsh-jigerdi talqylaýǵa nıetti. Eki kúnge sozylatyn sammıt Nýsa Dýa jartasynyń shyńynda ornalasqan Apurva Kempinski Bali kýrorttyq qonaq úıinde bolady.
Sessııa bastalar aldynda Indonezııa prezıdenti jáne 2022 jylǵy G20 Indonezııa tóraǵalyǵynyń basshysy Djoko Vıdodo sessııaǵa kelgen qatysýshy elder delegasııalarynyń basshylarymen jeke kezdesti. Vıdodo G20 sammıtiniń ashylýynda birlikke shaqyryp, jınalǵan kóshbasshylar álemniń jańa qyrǵı-qabaq soǵysqa túsýine jol bermeýi kerek ekenin atap ótti. Sammıt sessııalary jabyq esik jaǵdaıynda ótedi.
Sammıttiń ekinshi sessııasy 15 qarashada ótedi. Onda jahandyq densaýlyq saqtaý arhıtektýrasy qarastyrylady. Sammıttiń sıfrlyq transformasııaǵa arnalǵan úshinshi sessııasy 16 qarashada ótedi.
Aıta keteıik, G20 quramyna Argentına, Avstralııa, Brazılııa, Ulybrıtanııa, Germanııa, Úndistan, Indonezııa, Italııa, Kanada, Qytaı, Meksıka, Reseı, Saýd Arabııasy, AQSh, Túrkııa, Fransııa, Ońtústik Koreıa, Ońtústik Afrıka, Japonııa jáne EO kiredi.
Sammıtke G20 kóshbasshylarynan bólek, atap aıtqanda, DDU basshysy Tedros Adhanom Gebreııýs, FIFA prezıdenti Djannı Infantıno, Ekonomıkalyq yntymaqtastyq jáne damý uıymynyń (EYDU) Bas hatshysy Mattıas Kormann qatysady.
