Astana Hub qyzmeti IT-bıznes úshin ekojúıeni qalyptastyrýǵa, IT-talanttardy qoldaýǵa jáne startap jobalardy damytýǵa baǵyttalǵan. Búgingi tańda Astana Hub-ta 930 IT-kompanııa tirkelgen, onyń ishinde 170-i sheteldikterdiń qatysýmen jumys istep tur. Olarǵa aqparattyq-oqý, materıaldyq ınfraqurylym, bıznesti damytý baǵdarlamalary, arnaıy salyqtyq jáne vızalyq tártipter turǵysynan qoldaý kórsetiledi. Tehnopark rezıdentteri 12 myńnan astam jumys ornyn usynyp otyr.
Astana Hub iske qosylǵannan beri tehnopark qatysýshylarynyń jıyntyq tabysy 383 mlrd teńgeni quraǵan. Onyń ishinde IT qyzmetter eksporty 123,3 mlrd teńgege teń.
– Otandastarymyzdyń kópshiligi Astana Hub qatysýshylary jasaǵan startaptardyń ıgiligin kórip jatyr. Bul tehnologııalardy túrli saladan baıqaýǵa boldy. Máselen, jumysta Documentolog servısiniń, qalada Parqour parkıng qyzmetteriniń, CITIX smart taqtalarynyń, UvU qaýipsiz taksıiniń, «Qoljetimdi Qazaqstan» shekteýli adamdarǵa arnalǵan qoǵamdyq oryndardyń qoljetimdilik kartasynyń ıgiligin kórip otyrmyz. Osylaısha, Astana Hub qatysýshylary qazaqstandyqtarǵa kúndelikti ómirde kómektesip, qoǵamnyń damýyna atsalysyp jatyr, – deıdi Astana Hub bas dırektory Maǵjan Mádıev.
Tartylǵan ınvestısııa kólemi boıynsha startaptardyń úzdik úshtigi kelesideı: JET – mobıldi qosymsha arqyly skýterdi jalǵa berý qyzmeti; Serebra – neırondyq jeliler negizinde ınsýltti erte dıagnostıkalaý baǵdarlamasy, júıe Qazaqstan boıynsha 20 ınsýlt ortalyǵynda qanatqaqty rejimde jumys isteıdi; STOgramma – avtoservısterdi jáne qosalqy bólshekterdi izdeý platformasy.
2018 jyldan beri Astana Hub bazasynda 15 myńnan astam adam Startup School, No-code School, Freelance School, Beta Career, Tech Orda sııaqty bilim berý baǵdarlamalarynan ótken. Sondaı-aq 2 myńnan astam adam Astana Hub akselerasııa jáne ınkýbasııalaý baǵdarlamalarynyń túlekteri bolyp sanalady.
– Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsınniń bastamasymen qolǵa alynǵan Tech Orda baǵdarlamasy jekemenshik baǵdarlamalaý mektepterine IT-salasynda jeke tulǵalardy daıarlaýǵa qarjylyq qoldaý kórsetedi. Byltyr Astana Hub-tyń jeke qarajaty esebinen 13 IT-baǵdarlamalaý mektebiniń 100 stýdenti qarjylandyryldy. Osy jyldyń 1 qyrkúıeginde IT-mektepterden ótinimderdi qabyldaý jáne óńdeý bastalyp, 50 IT-mektebi akkredıtasııadan ótti. Qazir bólingen qarjy aıasynda oqýǵa qabyldanǵan tulǵalardy irikteý jumystary júrgizilýde. Jyl sońyna deıin 18 ben 45 jas aralyǵyndaǵy 3 myńnan astam talapker jekemenshik IT-mektepterine túsedi. Baǵdarlama aıasynda árbir baǵdarlamalaý mektebine bir oqýshyǵa 600 myń teńgeden aspaıtyn qarjy bólinedi, – deıdi M.Mádıev.
2025 jylǵa qaraı Sıfrlyq damý, ınnovasııalar jáne aeroǵarysh ónerkásibi mınıstrliginiń qoldaýymen elimizdiń jetekshi baǵdarlamalaý mektepterinde 20 myń stýdentti IT-daǵdylaryna oqytý josparlanǵan. Tech Orda baǵdarlamasy Memleket basshysy Qasym-Jomart Toqaevtyń 2025 jylǵa qaraı keminde 100 myń joǵary sanatty IT-maman daıarlaý qajettigi týraly tapsyrmasyna sáıkes júzege asyrylady.
Byltyr Scalerator dep atalatyn alǵashqy eksporttyq akselerator iske qosylǵany belgili. Baǵdarlama startaptarǵa Soltústik Amerıka, Eýropa, TMD elderi jáne Ońtústik-Shyǵys Azııa sııaqty jańa naryqtarǵa shyǵý, búkil álem boıynsha kompanııalarmen kelisimsharttar jasaý quzyrettiligin arttyrýǵa múmkindik beredi. Baǵdarlamanyń birinshi leginiń 10 aptasynda qatysýshylar 840 myń dollardan astam qarjyǵa eksporttyq kelisimsharttar men kelisimder jasady. Bıyl qyrkúıek aıynda 40 startap iriktelip, ekinshi legi bastaldy.
Sondaı-aq Seed Money baǵdarlamasy aıasynda 2021 jyldan bastap startaptar óz jobasyn damytýǵa qarjy ala alady. Bul ártúrli kezeńde (MVP, Product/market fit, MVP) IT-startaptaryna arnalǵan keshendi qoldaý baǵdarlamasy. Baǵdarlama boıynsha qarjylandyrý revenue share (equity free) modeli boıynsha júzege asyrylady, ıaǵnı qarajat ıgerilgennen keıin 3 jyl ishinde jobany iske asyrýdan túsetin kiristiń 1 paıyzyn tóleý mindettemesin bildiredi. Túsken qarajat IT-salanyń ekojúıesin odan ári damytýǵa jumsalady.
– Osy jyldyń sáýirinde Astana Hub halyqaralyq tehnoparki Google for Startups kompanııasymen seriktestik týraly kelisimge qol qoıyp, korporasııanyń Ortalyq Azııa aımaǵyndaǵy birinshi seriktesi atandy. Seriktestik aıasynda Ortalyq Azııa, Ázerbaıjan jáne Mońǵolııa elderi úshin Silkway Accelerator baǵdarlamasy iske qosyldy. Silkway Accelerator baǵdarlamasynyń birinshi legi aıasynda jobalaryn damytý múmkindigine ıe bolǵan 15 startaptyń 13-i baǵdarlamany sátti aıaqtady. Olar jańa álemdik naryqtarǵa shyqty. Akselerasııa baǵdarlamasyna qatysýshylardyń arasynda úsh aıdyń ishinde baǵasyn eki ese arttyrǵan kompanııalar da, aılyq tabysy 22 esege ósken startaptar da bar, – dep naqtylady tehnopark basshysy.
Silkway Accelerator baǵdarlamasynyń ekinshi legi 2 qyrkúıekte bastaldy, oqý Astanada offlaın rejimde ótedi jáne 3 aıǵa sozylady. Silkway Accelerator qatysýshylary tálimgerlikpen qatar, Astana Hub janynda tegin baspanaǵa, jumys ornyna jáne Seed Money baǵdarlamasy boıynsha 55 myń dollarǵa deıin qarjy alý múmkindigine ıe.
Dástúrli túrde kóptegen paneldik sessııalar, tehnoparkter kórmesi, IT-startaptar alleıasy, IT-mektepter kórmesi, IT-bos oryndar jármeńkesi, Astana Hub Battle baıqaýy jáne taǵy osy sekildi dúnıeler uıymdastyrylatyn Digital Bridge sıfrlandyrý halyqaralyq forýmy tehnopark qyzmetinde erekshe orynǵa ıe. Bıyldyń ózinde bul forým alańynda álemniń 15 elinen 25 myńǵa jýyq qatysýshy, 300 IT-kompanııa, 150 venchýrlyq ınvestor, 300-den astam spıker jáne 100 startap bas qosyp, Ortalyq Azııa elderin biriktirgen eń iri IT-platformaǵa aınaldy.
Ártúrli is-sharalar da turaqty túrde ótkiziledi. Olardyń qatarynda Pizza Pitch, Speaker Night, Startaphana sekildi is-sharalardy atap ótýge bolady. 2018-2022 jyldary jalpy sany 50 myńnan astam tyńdaýshyny qamtyǵan 1 myńnan astam is-shara ótkizilgen eken.
Eske sala keteıik, Astana Hub halyqaralyq IT-startaptar tehnoparki 2018 jyldyń 6 qarashasynda quryldy. Onyń qyzmeti – qatysýshylarǵa akselerasııa qyzmetterin, tehnologııalyq bıznes-ınkýbasııalaýdy usyný, konsaltıngtik, aqparattyq, analıtıkalyq, bilim berý, marketıngtik is-sharalardy ótkizý arqyly qatysýshylardyń damýyna jaǵdaı jasap, ınnovasııalyq ekojúıeni jetildirý.
