Memleket basshysy Qasym-Jomart Toqaev óńirge jumys saparynda Qonaev qalasyn damytýdyń josparyna jiti kóńil bólip, oblys ortalyǵy men Almaty qalasynyń seriktestigine serpin berýdi tapsyrǵan bolatyn. Sol mindettiń ishinde eki qalanyń arasyn jalǵaıtyn jedel poıyz jelisin iske qosýdy tapsyrǵan-dy. Jaqynda Prezıdent tapsyrmasy oryndalyp, Qonaev qalasynan shyǵyp, Almaty qalasyna toqtaıtyn elektr poıyzy iske qosyldy.
Alǵashqy reıs jóneltiler aldynda arnaıy saltanatty is-shara ótti. Oǵan oblys ákiminiń orynbasary, basqarma basshylary, qala ákimi, memlekettik qyzmetkerler, aqsaqaldar, «Jolaýshylar tasymaly» aksıonerlik qoǵamynyń bas dırektory jáne turǵyndar qatysty. Qos shahar arasyn jalǵaıtyn poıyz úshin eki beket iske qosylǵan. Onyń biri «Qapshaǵaı» stansasy bolsa, ekinshisi – avtovokzal mańyndaǵy stansa. Osy ýaqytqa deıin jolaýshylar Almatyǵa kólik arqyly jolǵa shyqsa, endigi kezekte poıyzben de dittegen jerlerine jetetin bolady. Bılet quny 400-450 teńge shamasynda.
– Áýelgi bir aı kóleminde poıyz Almaty-1 stansasyna qatynasa, jeltoqsan aıynan bastap Almaty-2 beketine júretin bolady. Al bılet qunynyń qoljetimdi bolyp qalýy úshin memleketten sýbsıdııa qarastyrylyp jatyr. Bul úshin 2023 jyly memlekettik satyp alý boıynsha arnaıy konkýrs oınatylady. Nátıjesinde jolaýshylardy tasymaldaıtyn kompanııa bekitilip, poıyzdyń qatynaý ýaqyty men baǵyty qaıta qarastyrylady jáne qajetti qarjy bólinedi. Jalpy, poıyz Qonaevtan tańǵy saǵat 6:00-de shyqsa, Almaty qalasynan keshki 19:00-de keri qaıtady. Aldaǵy ýaqytta qosymsha baǵyt ashylyp, poıyz tańǵy 6:00-da Almatydan Qonaev qalasyna attanatyn bolady. Qos qalanyń qonaqtary men turǵyndaryna jaılylyq syılaý úshin, eki araǵa baryp kelý ýaqytyn jıiletý maqsatynda «Qazaqstan temirjoly» kompanııasymen Almatydan beri qaraı baǵyt ashý boıynsha kelissózder júrgizip jatyrmyz, – deıdi Almaty oblysy jolaýshylar kóligi jáne avtokólik joldary basqarmasynyń basshysy Almas Batanov.
Almaty oblysy
