Kolledjder alıansyna Pavlodar, Qostanaı, Aqtóbe oblystarynan 14 orta arnaýly oqý orny jáne Eýrazııalyq top endi. Qazirgi zamanǵy eńbek naryǵy úshin tehnıkalyq kadrlardy daıarlaý – óńirdegi bilim berý júıesin damytý baǵyttarynyń biri ekenin atap ótken abzal. Buǵan deıin oblystaǵy 10 kolledj janynan quzyret ortalyqtary ashyldy. Sońǵy úsh jylda tehnıkalyq mamandardy daıarlaýǵa arnalǵan memlekettik tapsyrys eki esege ulǵaıyp, oblys boıynsha barlyq kolledj stýdentteriniń 80 paıyzyn qamtydy. 2025 jylǵa deıin bul kórsetkishti 100 paıyzǵa jetkizý josparlanyp otyr.
Aqsý qara metallýrgııa kolledjine aldaǵy ýaqytta alıanspen birlesip naqty óndirister men jańa ınvestısııalar úshin suranysqa ıe mamandyqtar boıynsha jańa bilim berý baǵdarlamalaryn ázirleý mindettelip otyr. Teorııa men tájirıbeniń, dýaldy oqytý formasy men dástúrli oqytýdyń araqatynasy, túlekterdiń jumysqa ornalasýyn baqylaý sııaqty máselelerdi sheshý osy saladaǵy jumystyń tamasha nátıjesi bolmaq.
Oblys kolledjderinde barlyǵy 22 myńǵa jýyq stýdent bilim alady. Olardyń kópshiligi kolledjdegi oqýmen qatar, óńirdegi 150-ge jýyq kásiporynda tájirıbe alý múmkindigi bar. Bul kásiporyndardyń eń irileri – ERG óndiristeri.
– Bizdiń qoǵamda tokar mamandyǵy qyzdarǵa jaraspaıdy degen teris kózqaras qalyptasyp qalǵan. Kolledjde osy biliktilik boıynsha kóptegen qyzdar bilim alyp jatyr. Bul mamandyqty ıgerý qıyn emes, oqý barysy óte qyzyqty. Quzyrettilik ortalyǵy alǵan bilimimizdi tájirıbe júzinde qoldanýǵa múmkindik beredi, – deıdi Aqsý qara metallýrgııa kolledjiniń 2-kýrs stýdenti Aleksandra Býkýmbaeva.
Pavlodar oblysynyń kolledjderi Eýrazııalyq toppen yntymaqtastyq ornatqannan beri barlyǵy 40 myńǵa jýyq maman daıarlaýdan ótken.
– Adamdarsyz biz eshteńe jasaı almaımyz. Sondyqtan bizge jas ári talantty, sonymen birge bilikti mamandar qajet. О́nerkásiptik mamandyqtardy jas urpaq úshin qyzyqty etý – bizdiń alǵashqy kezektegi mindetimiz, – deıdi ERG aksıoneri Aleksandr Mashkevıch.
Aqsý qara metallýrgııa kolledji 55 jyldyq mereıtoıyna oraı ERG quzyrettilik ortalyǵyn jańǵyrtýǵa arnalǵan syılyq sertıfıkatyna ıe boldy.
Pavlodar oblysy,
Aqsý qalasy
