– «QazMunaıGaz» IPO-ǵa joǵary óndiristik jáne turaqty qarjylyq kórsetkishtermen keldi. Aldaǵy ýaqytta bul nátıjeni júzege asyp jatqan jobalar esebinen odan ári jaqsartýdy kózdep otyrmyz. Kompanııanyń 100 paıyz aksııasy 5,1 trln teńgege baǵalandy. Sonda bir jaı aksııanyń baǵasy 8 406 teńgeden aınalady. Aksııalardy brokerler jáne olardyń mobıldi qosymshalary, birqatar kommersııalyq banktiń mobıldi qosymshalary, AIX bırjasynyń Tabys qosymshasy jáne «Qazposhta» bólimsheleri arqyly satyp alýǵa bolady. 14 qarashada IPO aıasynda roýdshoý bastaldy. Jergilikti AIX bırjasynda jáne Qazaqstan qor bırjasynda usynylǵan «QazMunaıGaz» IPO-syn keńinen tanystyrý maqsatynda óńirlerde jeke ınvestorlarmen kezdesýler ótkizemiz, – dedi Astanada jýrnalıstermen júzdesken «QazMunaıGaz» ulttyq kompanııasynyń basqarma tóraǵasy Maǵzum Myrzaǵalıev.
Onyń pikirinshe, aldaǵy ýaqytta kompanııa aksııalarynyń 25 paıyzǵa deıingi úlesi erkin naryqta satylýy ábden múmkin.
– Biz jeke tulǵalar arasyndaǵy ótimdilik naryǵyna zertteý júrgizdik. Búginde bul naryq 200-400 mln dollarǵa baǵalanyp otyr. Ázirshe naryqqa kompanııa aksııalarynyń 5 paıyzǵa deıingi úlesin shyǵardyq. Bul kórsetkish aldaǵy ýaqytta ósýi yqtımal. Iаǵnı IRO qorytyndysy boıynsha aldaǵy ýaqytta naryqqa qosymsha aksııalar paketin shyǵarý ıa shyǵarmaý týraly sheshim qabyldanatyn bolady. Jalpy, belgili bir ýaqytta ulttyq kompanııa aksııalarynyń 25 paıyzy erkin naryqta saýdalanýǵa tıis degen túsinik bar, – dedi «QazMunaıGaz» basshysy.
Aıtpaqshy, «QazMunaıGaz» IRO-synyń osydan birneshe jyl burynǵy «Halyqtyq IRO»-dan ózindik aıyrmashylyǵy bar. «Halyqtyq IPO» eń aldymen otandyq ınvestorlar úshin ǵana qoljetimdi boldy. Aksııalardy satyp alýǵa ınstıtýsıonaldy ınvestorlar da múmkindik aldy. Alaıda bólý kezinde birinshi kezekte jeke ınvestorlarǵa basymdyq berildi. Al «QazMunaıGaz» IPO-synda ınvestorlardyń turǵylyqty jerine qatysty shekteý joq. Degenmen basymdyq Qazaqstan azamattaryna, ıaǵnı jeke tulǵalarǵa berilmek.
Ulttyq kompanııa basshysy «QazMunaıGazdyń» sońǵy birneshe jyldaǵy óndiristik jáne qarjylyq kórsetkishteri turaqty ekenin atap ótti. Qazirgi ýaqytta kompanııanyń shoǵyrlandyrylǵan aktıvteri 32 mlrd dollarǵa teń. Osy jyldyń 30 maýsymyndaǵy jaǵdaı boıynsha aksıonerlik kapıtal 19 mlrd dollardan asqan.
– Birinshi jartyjyldyqtyń qorytyndysy boıynsha, kompanııanyń taza paıdasy 677 mlrd teńgeni qurady. Al bos aqsha aǵymy 188 mlrd teńgege teń. «QazMunaıGazdyń» turaqty qarjylyq kórsetkishteri tólengen dıvıdend kólemin 2016 jyldyń qorytyndysy boıynsha 45 mlrd teńgeden 2021 jyly 200 mlrd teńgege deıin ulǵaıtýǵa múmkindik berdi. Sonymen qatar kompanııa bolashaqta aksııalar qunynyń ósýine sebep bolatyn biregeı jobalarǵa ıe, – dedi M.Myrzaǵalıev.
Basqarma tóraǵasy munaı óndirý deńgeıin arttyrýǵa baǵyttalǵan jobalar kompanııanyń odan ári damý núktesi retinde qarastyrylatynyn jetkizdi. Mundaı jobalardyń qatarynda Teńiz ken ornynda óndirýdi qazirgi 27 mln tonnadan 40 mln tonnaǵa deıin, ıaǵnı 40 paıyzǵa ulǵaıtýǵa múmkindik beretin Bolashaq keńeıtý jobasy, sondaı-aq Qashaǵanda óndiristi ulǵaıtý boıynsha jobalar bar. Bul bolashaqta kompanııa tabysynyń ósýine serpin berýi kerek.
– Odan bólek, 2022 jyly qyrkúıekte «QazMunaıGaz» «Samuryq-Qazyna» qorynan «QMG Qashaǵan B.V.» kompanııasyndaǵy 50 paıyz úlesin satyp aldy, ol Soltústik Kaspıı jobasy (Qashaǵan jobasy) ónimin bólý týraly kelisimde 16,88 paıyzdyq úleske ıe. Bul – «QazMunaıGazdyń» sońǵy jyldardaǵy eń iri mámileleriniń biri. Qashaǵan jobasyndaǵy úlestiń artýyna baılanysty «QazMunaıGazda» shoǵyrlandyrylǵan óndirý, EBITDA, taza paıda men aktıvterdiń kórsetkishteri de jaqsarady, – dep naqtylady ol.
Sondaı-aq «QazMunaıGaz» geologııalyq barlaý salasynda qurlyqta da, teńizde de birqatar jobany belsendi júrgizip keledi. Mundaı jobalarǵa Torǵaı paleozoı blogynda bastalǵan geologııalyq barlaý, Qaraton-Saryqamys geologııalyq barlaý jobalary jáne basqalary kiredi.
– Ulttyq kompanııa Kaspıı teńiziniń qaırańyndaǵy barlyq barlaý jobasyna qatysady. Táýekelder men shyǵyndardy bólý maqsatynda halyqaralyq áriptestermen birlesip ázirlenip jatqan Abaı, Isataı, Jeńis, Ál-Farabı sııaqty teńiz jobalaryn da atap ótýge bolady. Sondaı-aq qorjynymyzda Qalamqas jáne Hazar sekildi teńiz ken oryndary bar. Olardyń munaı qory rastalǵan, ıgerýdi bastaý aldaǵy jyldarǵa josparlanǵan, dedi ulttyq kompanııasynyń basshysy.
M.Myrzaǵlıevtiń pikirinshe, kompanııa bıznesiniń ósýi úshin taǵy bir mańyzdy baǵyt – munaı-gaz hımııasy. 8 qarashada qýaty jylyna 500 myń tonna polıpropılen shyǵarýǵa jetetin zaýyt iske qosyldy. Polıetılen jáne býtadıen shyǵaratyn zaýyttar salý josparlanýda. Eske sala keteıik, osy jyldyń 13 maýsymynda «QazMunaıGaz» «Samuryq-Qazyna» qorynan «Qazaqstan Petrokemıkal Indastrız Ink» JShS-nyń (KPI Inc.) 49,5 paıyz úlesin satyp aldy. Osylaısha, «QazMunaıGaz» daıyn polıpropılendi satýdan túsken tabystyń bir bóligine ıe bolady. Bul kompanııanyń qarjylyq kórsetkishterine oń áser etpek.
